Условот на ДУИ за премиер Албанец е уценувачка порача, вели лидерот на СДСМ Зоран Заев во интервју за Телма.
Заев рече дека одлуката за тоа кој ќе биде мандатар ја носат граѓаните и дека дури и ако ДУИ го повлече условот, тој останува на ставот дека партијата треба да оди во опозиција.
„Сум докажал дека немам предрасуди за етничката припадност за било кој кандидат. ДУИ не одлучува за оваа работа, туку граѓаните. Впрочем, кога јас бев мандатар Талат Џафери стана претседател на Собранието. Меѓутоа тој имаше искуство и кредибилитет. И се покажа како прилично добар претседател на Собранието. Значи не сме ја промашиле работата. Значи не ги изневеривме очекувањата на граѓаните“,
рече Заев.
На прашањето, што ако ДУИ е одлучувачки фактор на овие избори, Заев рече дека нема да прифатат никакви уцени и дека имаат и други опции.
„Уцени не прифаќаме никако. Без разлика каква ќе е цената. Опции имаме и ги гледаме. Алијанса за Албанците и Алтернатива како коалиција се сериозна опција, да видиме малите политички партии, колку мандата ние ќе добиеме. Сето тоа е отворено. Јас оставам простор граѓаните да го дадат легитимитетот кој што да биде во оваа држава“,
рече Заев.