Фокус на владеењето на СДСМ и ДУИ ќе биде подобрување на стандардот на граѓаните, рече лидерот на СДСМ и мандатар за составување нова влада, Зоран Заев, по вечерашниот состанок на Централниот одбор на партијата на кој беше потврден договорот за коалицирање.
„Централниот одбор го усвои договорот за коалицирање со политичката партија ДУИ. Со овој договор е обезбедено паламентарно мнозинство и нова Влада која во полн четиригодишен мандат ќе ги реализира програмските определби и принципи околу кои сме обединети. Јас ќе бидам премиер во полн четиригодишен мандат. Имавме доволно големина и јас и Ахмети и СДСМ и ДУИ да се согласиме јас да ја водам Владата четири години, а од друга страна во последните 100 дена премиерот да дојде на предлог на ДУИ со заедничка согласност“,
рече Заев.
Според Заев, партиите СДСМ и ДУИ ги услогласуваат изборните платформи во четиригодишна програма. Заев рече дека главен фокус ќе биде ставен на подобрување на стандардот на граѓаните, покачување на платите и пензиите, отворање нови работни места, поддршка на домашната економија и странските инвестиции.
„Во делот на судските реформи ќе инсистираме на силна транспарентност и конкретна одговорност во поглед на распределбата на предметите, како и работата на сите обвинители и судии. Следува прочисување на судството и проверка на потеклото на имотот и парите на функционерите“,
рече Заев.
Заев рече дека идната Влада ќе биде посветена на целосна имплементација на договорите со Грција и со Бугарија, како и на Охридскиот договор.
„Пред на се четири години домашни предизвици со кои ќе гледаме како буквално пред очи како земјата се трансформира на подобро низ поглавјата, преговорите, европеизацијата и кревањето на економскиот стандард и севкупниот квалитет на живот на граѓаните. Ова се четири години во кои како земја многу повеќе ќе добиваме отколку што ќе даваме“,
порача Заев.
Новата Влада ќе има 19 министри и премиер, наместо 26 како досега. Од предложените ресорни министри од редовите на СДСМ половина се жени, а половина се мажи.