Според лидерот на СДСМ, договореното законско решение гарантира дека сите судски процеси што произлегуваат од СЈО ќе добијат правна разрешница пред надлежните судови
Преку независната пратеничка група, во последното решение за законот за јавно обвинителство се вградени и дел од барањата на ВМРО-ДПМНЕ, објави вечерва на фејсбук лидерот на СДСМ Зоран Заев. Тој вели дека договорената верзија на законот нема да овозможи скриена амнестија.
„Вечерва е постигната доволно добра основа за да почне процедурата за носење закон за јавно обвинителство. Очекувам Владата вечерва да заседава и да го усвои предлог-текстот на законот за кој постигнавме широка политичка согласност.
вели Заев.
По усвојувањето од страна на Владата, законот треба да оди во Собранието, каде што, по скратена постапка, се надевам дека ќе добие поддршка од најмалку 2/3 од пратениците“,
Усвојувањето на овој закон, како што наведува, ќе биде голем придонес кон нашата европска интеграција и аргумент плус за Европската унија да донесе позитивни одлуки поврзани со почетокот на преговорите. Според Заев, особено важно е тоа дека законот ги овозможува неопходните услови за владеење на правото во нашата земја и за конечна и темелна изградба на правната држава.
„Низ разговорите, кон содржината на предлог-законот беа вградени и голем дел од предлозите на ВМРО-ДПМНЕ, за кои се застапуваше и се избори Независната пратеничка група на ВМРО-ДПМНЕ и Коалицијата за подобра Македонија. Со тоа се изнајде решение со кое ќе се обезбеди функционирањето на принципот на владеењето на правото, согласно со европските вредности и со што се создаваат услови да се овозможи фер и еднаквост на страните во постапките, а со крајна цел да се овозможи правда“,
напиша лидерот на СДСМ.
Заев тврди дека предлог- законот гарантира дека сите судски процеси кои произлегуваат од СЈО ќе добијат правна разрешница пред надлежните судови, низ професионална и фер постапка, базирана на докази.
„Она што ни беше една од основните цели, го обезбедивме – во законот нема скриена амнестија, секој за кој постои обвинение ќе си одговара пред институциите! Упатувам голема благодарност до ЕУ, до САД и до државниот јавен обвинител за нивните напори и за помошта при дефинирањето на содржината на овој предлог-закон за јавно обвинителство. Им благодарам и на сите пратеници и сите експерти кои дадоа свој придонес и ги повикувам сите политички сили во земјата да го поддржат законското решение, за уште еднаш заедно да го потврдиме европскиот пат на нашата земја и заедно да ја потврдиме нашата стратешка определба за обезбедување правна држава“.
напиша Заев, пред почетокот на вечерашната владина седница, на која се очекува да биде усвоен предлог-законот за ЈО и да биде пуштен во собраниска процедура.