Во случај денеска да биде поднесена „интерпелација“ за Владата, собраниската седница за тоа би требало да се одржи најдоцна до четврток, односно во рок од три дена. За на Владата да ѝ биде изгласана недоверба, ќе бидат потребни најмалку 61 глас. Апсолутно мнозинство е потребно и за сите следни сценарија, како формирање ново мнозинство или распуштање на Собранието
Денеска во 14:30 часот истекува ултимативниот рок што му го постави лидерот на досегашната опозиција на премиерот Зоран Заев, кој има уште неколку часа до одлука дали ќе ја официјализира оставката, што ја најави ноќта на 31 октомври, со тоа што ќе ја испрати во пишана форма во парламентот или, пак, ќе „ризикува“ тест на доверба во Собранието.
Мицкоски и синоќа тврдеше дека има 61 пратенички глас за уривање на владата на Заев. Во врска со можноста да падне Владата, а потоа да не се формира ново парламентарно мнозинство, тој рече дека треба да се оди чекор по чекор.
„Ајде, прво, првата работа, да се качиме на првата скала прво, да не гледаме на 27-та. Да ја завршиме прво првата работа, потоа има процедури, закони, Устав кои треба да се почитуваат. Тоа не зависи понатаму од нас, зависи од тој што треба да го почитува Уставот. Мандат му се дава на мнозинството. Да почекаме да се случи првата работа, Зоран Заев да си го исполни единственото ветување кое очекуваме да го исполни, иако лично не очекувам. Но, во понеделник во 14:30 ч. ја доставуваме иницијативата во парламентот и понатаму оставаме на претседателот на парламентот да ги почитува законските рокови и процедурите кои важат“,
одговори лидерот на ВМРО-ДПМНЕ.
Во случај денеска да се реализира најавата на ВМРО-ДПМНЕ за поднесување „интерпелација“ за Владата, собраниската седница за тоа би требало да се одржи најдоцна до четврток, односно во рок од три дена од поднесување на иницијативата. За на Владата да ѝ биде изгласана недоверба, ќе бидат потребни најмалку 61 глас, што Мицкоски тврди дека ги има. За сите други опции што би следувале потоа, како формирање ново мнозинство (за избор на нова Влада) или распуштање на парламентот (со цел предвремени парламентарни избори), исто така, е потребно апсолутно мнозинство во законодавниот дом.
Паралелно, од вториот партнер во Владата – ДУИ вчера дојде информација дека партискиот лидер Али Ахмети добил овластување од сопартијците да разговара со претставници на другите партии, со цел да се одржи политичката стабилност.
„Тие разговори се со цел да државата оди напред, на патот кон реформите се разбира во блиска консултација со нашите стратешки партнери. Земјата е членка на НАТО и има одговорност за овој Сојуз и во тој дух во консултација со партнерите сакаме да им упатиме порака на граѓаните да бидат спокојни затоа што како што секогаш сме знаеле да го зачуваме овој курс на државата да бидеме заштитници на оваа држава, да бидеме сидрото на евроатлантските вредности така ќе продолжиме и ќе обезбедиме сигурна иднина на граѓаните“,
изјави Бујар Османи по синоќешната седница на раководството на ДУИ.
Од партијата велат дека нема да разговараат со оние што се против евроатлантскиот курс и стратегиските интереси на државата.