Со овластувањето кое го доби, Ахмети ќе разговара со претставници на другите партии со цел да се одржи политичката стабилност. Од партијата велат дека нема да разговараат со оние кои се против евроатлантскиот курс и стратешките интереси на државата. До граѓаните, пак, упатуваат порака да бидат спокојни бидејќи ќе се работи на зачувување на евроатлантскиот курс
По тричасовната седница на Централниот одбор на ДУИ, партиското раководство го овласти лидерот Ахмети сам да носи одлуки, соопшти портпаролот на партијата Бујар Османи.
„Членовите на Централниот одбор разговараа за тоа кои се интересите на граѓаните и интересите на државата. Се согласија дека продолжувањето на евроатлантскиот курс на државата е безалтернативна и дека е неопходно да се смогнат сите сили и да се направат сите напори со цел овој евроатлантски курс на државата да биде гарантиран, бидејќи е без алтернатива, како и да се продолжи со реализација на важните инфраструктурни проекти кои се започнати, а се значајни за подобриот стандард и подобриот живот на граѓаните. Едногласно Централниот одбор го овласти претседателот Ахмети да продолжи да разговара со сите политички партии како важен и одлучувачки фактор после парламентарните и локалните избори со цел да се задржи овој прогресивен пат и овој евроатлантски курс на државата, притоа разговарајќи со сите политички партии со двата блока освен тие што се против овој евроатлантски курс, против стратешките интереси на граѓаните и државата“,
изјави Бујар Османи.
Тој потенцираше дека со тоа овластување кое го има од Централниот одбор, Ахмети продолжува да разговара со претставници на другите партии со цел да се одржи политичката стабилност.
„Тие разговори се со цел да државата оди напред, на патот кон реформите се разбира во блиска консултација со нашите стратешки партнери. Земјата е членка на НАТО и има одговорност за овој Сојуз и во тој дух во консултација со партнерите сакаме да им упатиме порака на граѓаните да бидат спокојни затоа што како што секогаш сме знаеле да го зачуваме овој курс на државата да бидеме заштитници на оваа држава, да бидеме сидрото на евроатлантските вредности така ќе продолжиме и ќе обезбедиме сигурна иднина на граѓаните“,
рече Османи.
На новинарско прашање за заканите на Шкодране Дардишта, Османи рече тоа дека е индивидуален став.
„Не е член на ниту едно тело на партијата. Мислам дека е непромислена изјава за која Ахмети кажа став. Мислам дека треба да го сметаме за индивидуален став. ДУИ не треба да се инволвира во оваа приказна, ДУИ не треба да одговара за ставот на секој граѓанин доколку не е член на кое било раководно тело“,
истакна Османи.
Седницата на раководството на ДУИ беше закажана со цел да се дебатира за натамошните потези на партијата со оглед на понудената оставка на премиерот Зоран Заев.