Мицкоски: ВМРО-ДПМНЕ сега е единствена македонска партија; Заев: СДСМ е прва мултиетничка партија
Лидерот на СДСМ Зоран Заев соопшти вечерва дека и на овие избори ќе биде носител на листата на колаицијата на СДСМ во Четвртата изборна единица, како и на сите парламентарни избори од 2008 година година досега, со исклучок на изборите во 2014 година.
Наспроти тоа, лидерот на ВМРО-ДПМНЕ Христијан Мицкоски најави дека следната седмица ќе заседава партискиот Централен комитет и тогаш ќе се направат анализи дали тој да биде носител на листа, кандидат на некоја од листите или да остане само кандидат за премиер.
На крајот на вечерашниот ТВ-дуел на Канал 5, Мицкоски рече дека и натаму се залага за т.н. шпицен кандидат, како носител на мандатот, кој нема да бара закрила во парламентот во случај на изборен пораз. Но, со оглед на тоа што Заев не прифаќа такво решение, Мицкоски рече дека форумите на ВМРО-ДПМНЕ ќе направат анализа дали тој да биде и кандидат за пратеник на изборите или само кандидат за формирање на новата влада.
Заев, пак, го покани Мицкоски и на изборен дуел во „четворката“ , посочувајќи дека искуството на СДСМ од изборите во 2014 година, кога целото партиско раководство се иззема од кандидатските листи за пратеници, било несоодветен потег. Според Заев, учеството на партиските лидери како носители на листи на изборите значи и преземање одговорност за изборниот исход.
*поврзани вести: Ќе има ли директен дуел Заев – Мицкоски на изборите?
Двеасетина дена пред стартот на изборната кампања, и Заев и Мицкоски отфрлаат можност за формирање широка коалиција на власт по изборите, со учество на двете најголеми партии во земјава. И двајцата лидери уверуваат дека нивните партии, односно коалиции, ќе однесат убедлива победа на изборите.
„Со вакви политики на Мицкоски, јас и мојата партија не сме подготвени да влеземе во коалиција со ВМРО-ДПМНЕ. Но подготвен сум по убедливата победа на СДСМ да седнам на иста маса со сите партии за да разговараме за приоритетите во следниот период“,
рече Заев.
Мицкоски, пак, рече дека, по изборите, Заев ќе биде збунет, како што нагласи, од големиот пораз, кога ќе требало да носи одлука дали ќе остане само на чело на СДСМ или ќе замине од политиката.
Иако вчера и посака среќа на коалицијата СДСМ – Беса, Мицкоски вечерва го нападна Заев дека е лицемерен и дека глуми опозиција на албанскиот политички блок.
„Помалку чудно и лицемерно е сега Заев да биде критичар на ДУИ и да краде гласови од албанскиот политички блок. Заев го потценува македонското гласачко тело. ВМРО-ДПМНЕ е сега единствена македонска политичка партија, додека СДСМ глуми опозиција на албанскиот политички блок“,
рече Мицкоски.
Заев возврати дека Мицкоски ги потценува другите етнички заедници и нагласи дека македонското општество отсекогаш било мултиетничко.
„Коалицијата со Беса е историски исчекор, за разлика од порано кога такви коалиции се правеа постфестум. Оваа коалиција, освен што е и на идеолошка основа, значи и седум до осум мандати повеќе,“
оцени Заев, посочувајќи дека по изборите би разговарал и со други партии за поголемо мнозинство во парламентот.
*поврзани вести: Заев и Касами си дадоа „беса“ за заеднички настап на изборите – контра Мицкоски и Ахмети
Кон крајот на дуелот, Мицкоски му подари значка од НАТО на Мицкоски, поради тоа што, како што рече, ВМРО-ДПМНЕ гласаше за ратификација на Северноатлантскиот договор, иако не го признава новото уставно име на земјата. Мицкоски возврати со подарок – паричник, но Заев не го прифати.