Премиерот Зоран Заев, кој денеска е во посета на Софија, утрово се сретна со раководството на партијата ГЕРБ и со нејзиниот претседател Бојко Борисов. Двајцата, како што соопшти Заев на „Твитер“, разговарале за овозможувањето дијалог и разбирање меѓу младите и идните генерации.
„Работната агенда во Софија ја почнавме со раководството на ГЕРБ и мојот пријател Борко Борисов. Разговаравме дека е многу важно да овозможиме младите генерации да имаат дијалог и разбирање. Не смееме да дозволиме младите да ни се замразат,“
напиша Заев на „Твитер“.
???? Работната агенда во Софија ја почнавме со раководството на ГЕРБ и мојот пријател @BoykoBorissov.
— Зоран Заев (@Zoran_Zaev) June 17, 2021
Разговаравме дека многу е важно да овозможиме младите генерации да имаат дијалог и разбирање. Не смееме да дозволиме младите да ни се замразат. pic.twitter.com/y1ArSmxJPi
Премиерот Заев заедно со вицепремиерот за европски прашања Никола Димитров и министерот за надворешни работи Бујар Османи престојува во работна посета на Софија со цел да се интензивираат напорите за наоѓање решенија за отворените прашања и за деблокада на европската интеграција на Северна Македонија.
Од владината прес-служба соопштија дека премиерот и владината делегација ќе остварат работни средби со претседателот на Бугарија, Румен Радев, со премиерот Стефан Јанев, како и со претставници на поголемите политички партии во земјата.
Вчера премиерот на техничката влада во Бугарија порача дека решението за спорот меѓу двете земји не треба да им се остава на историчарите, туку на политичарите.
И бугарското МНР непосредно пред посетата на Заев на Софија, вчера испрати соопштение во кое наведува дека не се исполнети условите за одржување меѓувладина конференција со Северна Македонија.
Во соопштението се наведува дека позицијата на Бугарија во однос на евроинтеграцијата на РС Македонија останува непроменета, но дека соседната држава останува отворена за дијалог.
Како што се посочува, Советот на министри ја одобри позицијата на Бугарија да учествува на состанокот на Советот за општи работи на ЕУ, што ќе се одржи на 22 јуни во Луксембург.