„СДСМ ќе го поддржи СДСМ“. Ваков одговор даде лидерот на социјалдемократите, Зоран Заев, на прашањето кој од коалициските партнери – ДУИ или Беса, би поддржала партијата на локалните избори во Тетово.
Со тоа Заев најави дека, најверојатно, во оваа општина неговата партија би имала свој кандидат, а доколу тој не влезе во втор круг, тогаш би дале поддршка за некој од партнерите.
„СДСМ ќе го поддржи СДСМ. Ги имаме трите коалициски партнери. Таму имаме тројца коалициски партнери кои сигурно настапуваат со свои кандидати. Нашето општинско раководство вели дека треба и ние да настапиме. Дел од анкетите ни покажаа дека спаѓаме во првите три партии на локално ниво и, секако, локалните избори се избори на личности. Ако се мотивира вистински кандидат, вредно е да размислиме. Правиме анкети во Тетово на неколку кандидати кои поднесоа и кандидатури. Логично е да одиме со наш кандидат, секој да оди со свој кандидат во такви средини, за во вториот круг, кога би останала една владејачка и една опозициска партија, да се поддржи кандидатот од владејачките партии“,
изјави Заев.
Во врска со изборите, тој веќе имал средби со Мендух Тачи од ДПА и Билал Касами од Беса, а до крајот на неделава ќе се види и со лидерот на ДУИ, Али Ахмети.
„Со Тачи се видов пред две-три недели, исто и со Билал Касами, а до крајот на оваа недела треба да се видам со Ахмети. Сите потврдуваме заедничко помагање, зашто сме коалиција на централно ниво, а убаво би било тоа да биде преточено и на локално ниво. Логично е коалициски да се поставиме, најголем дел ќе бидат коалициски настапи во првиот круг, 50 отсто, 25 или 30 проценти би биле во вториот круг и некаде по завршување на изборите ќе правиме повторно коалиција“,
изјави Заев.