Премиерот Зоран Заев вели дека во последната година болните пратениците од ковид беа често изговор за блокирање на работата на Собранието, но тоа сега нема да може да се злоупотребува, бидејќи пратениците веќе се ревакцинираат против ковид.
Во отсуство на суштинска аргументација не треба да има предвремени парламентарни избори и по две децении ред е да одиме на редовни во 2024 година со цел да се даде шанса економијата да живее, да функционира општеството и граѓаните да си го планираат својот живот и својата работа, вели премиерот Зоран Заев во интервју за весникот „Коха“.
Нереално е, вели тој, во отсуство на квалитетни концепти и стратегии од најголемата опозициска партија ВМРО-ДПМНЕ, таа да формира поголемо парламентарно мнозинство од актуелното, особено што, како што нагласува, „досега преку користењето на деловничкото право да се поднесат илјадници амандмани само ја кочеа работата на Парламентот особено во Комисии каде што претседател е од опозицијата или слично, а тоа не се решава со нови парламентарни избори есента“.
„Сега ни претстојат локални избори, многу важни избори за градоначалници и советите во општините. Исклучително значајни за животот на граѓаните, бидејќи секојдневното функционирање во огромен процент е врзан со општината. Под надлежност на општините се школите, градинките библиотеките, пожарните, комуналните претпријатија и нивното квалитетно функционирање е многу важно за секојдневието на граѓаните“,
вели Заев за „Коха“.
На локалните избори, според него, најважен ќе биде квалитетот на кандидатите кои ќе се понудат на граѓаните и затоа, како што најави, следува период на сериозни истражувања и анализи, теренски анкети со луѓето со цел да им кажат што е најдобро, бидејќи тие кои ќе бидат поставени ќе им служат на граѓаните.
Очекува успешни локални избори, пред сè демократски, фер и чесни и верува дека „понесената победа ќе биде дополнителна потврда дека се движат во вистинскиот правец, да се подобруваат и да им служат на граѓаните“.