Мендух Тачи во гостување за косовска телевизија изјави дека и тој се залага за етнички мешана коалиција, ама не по теркот на коалицијата СДСМ-Беса. Лидерот на ДПА смета дека оваа коалиција е поради тоа што СДСМ котира послабо кај етничките Македонци
Планирана е средба на високо ниво меѓу претставници на СДСМ и на ДПА, но тема на разговорите, според извори од „Бихаќска“, нема да биде можноста за коалиција меѓу двете партии. Беса, најверојатно, останува единствен партнер на СДСМ од албанскиот политички блок, додека ДПА или ќе оди сама на изборите или ќе коалицира со НДП на Вејсел Мемеди.
Додека лидерот на СДСМ, Зоран Заев, пред некој ден остави простор за разговори со ДПА во контекст на можна соработка на изборите, Мендух Тачи, во гостување за косовска телевизија, изјави дека и тој се залага за етнички мешана коалиција, ама не според теркот на коалицијата СДСМ-Беса.
Според лидерот на ДПА, коалицијата меѓу СДСМ и Беса на Билал Касами е базирана на анализи дека партијата на Заев котира послабо од ВМРО-ДПМНЕ кај македонското гласачко тело. Гостувајќи на косовската телевизија Т7, Тачи изјави дека Албанците во Северна Македонија, од друга страна, се наклонети кон СДСМ затоа што не гледаат друг начин да ја дефакторизираат ДУИ.
„Јас комуницирам со луѓе. Можеби 60 проценти од нив гласале за СДСМ. Јас им пристапувам и ги прашувам, зошто гласавте? Тие велат дека гласале за СДСМ бидејќи ДУИ ги уништи. Десет години се на власт со ВМРО-ДПМНЕ, така што Албанците дојдоа до заклучок дека нема друга шанса да ја тргнат ДУИ, освен ако гласаат за македонска партија која е голема и има значителен број пратеници“,
изјави Тачи.
Според него, можеби единствената корист по доаѓањето на СДСМ на власт е тоа што е деблокиран процесот на евроатлантската интеграција на земјата.
„Ги прашувам луѓето дали се сменило нешто, бидејќи од економски аспект ситуацијата со Албанците е полоша. Но само едно прашање е позитивно – тоа што го деблокиравме процесот на интеграција. Јас сè уште се залагам за договор на албанска политичка сила со македонска политичка сила, но не во оваа форма. Анкетите се такви што покажуваат дека кај Македонците СДСМ е подолу“,
вели Тачи.
Уште пред неколку месеци, ДПА прва се спомнуваше како можен нов партнер на СДСМ, со оглед на тоа што Тачи, по долгогодишно ривалство со социјалдемократите и третман на ВМРО-ДПМНЕ како „стратегиски партнер“, во 2018 година, сепак, стана дел од парламентарното мнозинство. Сепак, досега опозициската Беса е единствената нова партија со која Заев склучи договор за заеднички настап на парламентарните избори на 12 април.
Првата мултиетничка коалиција на парламентарни избори, што Заев и Касами ја оквалификуваа како историска, предизвика жестоки реакции од досегашните партнери на СДСМ-ДУИ. Функционери на ДУИ оценија дека со вакви сојузништва се дефакторизираат Албанците во земјава.
*Поврзани текстови: ДУИ ја критикува Беса и негира формални коалиции со ВМРО-ДПМНЕ и СДСМ во минатото