Премиерот Зоран Заев во првичната реакција по објавувањето на Извештајот за напредокот на земјата во ЕУ и на Економско-инвестицискиот пакет за Западен Балкан оценува дека тие имаат посебно значење бидејќи се случуваат во амбиент на зајакнато внимание на процесот на проширување помеѓу земјите-членки, во време на тековните дискусии за преговарачката рамка за Северна Македонија и во очекување на првата меѓувладина конференција меѓу нашата земја и ЕУ.
„Радува што во извештајот за Северна Македонија е констатирано дека содржинскиот дијалог на нашата Влада со Европската комисија се наоѓа на многу повисоко ниво. Се наведува дека Северна Македонија во голем број области постигнува високо ниво на усогласеност со европското законодавство и се препорачува имплементација и испорака на уште поголеми резултати“,
вели Заев во реакцијата на Фејсбук.
Тој нагласува дека посебно се издвојуваат наодите на Европската комисија во областите на фундаменталните вредности, изборите, владеењето на правото, судството и борбата против корупцијата.
Од наодите кои се наведени во извештајот, вели Заев, може да се заклучи дека земјата е на добар пат и треба да продолжи со имплементацијата на веќе донесените закони и постоечки механизми.
Заев се осврнува и на Економско-инвестицискиот пакет и нагласува дека се испраќа силна порака со финансиската поткрепа од 9 милијарди евра, која доаѓа во комбинирана форма на грантови и поволни заеми, а е со цел за да се поддржи економската усогласенот на Западен Балкан со ЕУ.
„Финансиската поткрепа ќе испрати силна порака за поддршка на европската перспектива на регионот и за комплементарноста на реформските процеси со забрзаниот економски развој“,
вели Заев.