Додека од Владата го обвинуваат опозицискиот лидер за потпалување на политичката атмосфера, од ВМРО-ДПМНЕ и денеска зборуваат за нови барања од Софија, наводно, за уставни измени и за редефинирање на македонската нација и откажување од македонската историја
Сакаме да им дадеме шанса на разговорите со Бугарија, рече денеска премиерот Зоран Заев, оценувајќи ја како неодговорна изјавата на лидерот на ВМРО-ДПМНЕ, Христијан Мицкоски, дека шефовите на дипломатиите на двете земји разговарале за нов договор, по примерот на договорот од Преспа.
„Не знам на што мисли Мицкоски, но ние имаме разговори, тие се дел и пишани материјали. Јас не би ги коментирал изјавите на Мицкоски, затоа што сѐ што видовме од него е едно неодговорно однесување. Ние сме одговорни, сакаме договори, сакаме земјата да ни оди напред и верувам дека даваме максимални напори, позитивни аспирации, внимание и пријателство, за да ги постигнеме договорите и, секако, она што е најважно за нас, да ги заштитиме нашите интереси, но водејќи грижа и за интересите на бугарската страна“,
изјави денеска Заев.
Тој посочи дека, ако се продолжи со вакви предлози, постои можност и да не почне првата меѓувладина конференција (која се очекува до крајот на годината н.з.). Но, како што нагласи Заев, тоа сигурно не е интерес ниту на бугарскиот народ ниту на премиерот Бојков Борисов, но и на бугарскиот претседател Румен Радев.
„Затоа даваме шанса нашите министри, советниците, сите луѓе кои учествуваат во ова да продолжат за да се изнајде решение, решение може да се најде. Кога зборувате за нешто што е дел од веќе прифатени и усогласени работи, како што е заедничката историја, тогаш треба да бидете паметни да го искористите тоа за пријателство, а не за непријателство и поделби. Затоа сме вака внимателни, треба да се даде шанса, можеме да ја ефектуираме одлуката“,
рече Заев.
Министерот за надворешни работи Бујар Османи денеска изјави дека односите со соседите не се регулираат со шпекулации и тенденциозни изјави кои имаат за цел да ја вжештат атмосферата, коментирајќи ја изјавата на Мицкоски дека шефицата на бугарската дипломатија Екатерина Захариева предложила редефинирање на македонската нација, преку нов договор, сличен на договорот со Грција, кој би претпоставувал и уставни измени.
Од ВМРО-ДПМНЕ, пак, велат дека проблемот со Бугарија настанал откако Заев ветил сѐ што денес Бугарија и владата во Софија бара од него да исполни.
„За ова има лични признанија од бугарски политичари во врвот. Заев излажа дека ги има затворено клучните прашања за Македонија. Затоа Заев е должен да каже дали последните барања од Захариева се уставни измени по теркот на договорот со Грција, редефинирање на македонската нација и откажување од македонската историја. Јавноста заслужува одговори и вистински срам е што овие информации се дознаваат од неофицијални места, а не од официјалните извори од Владата на Македонија“,
изјави Наум Стоилкоски, портпаролот на ВМРО-ДПМНЕ, одговарајќи на новинарско прашање на денешната прес-конференција.