Средбата следува откако Централното претседателство на Алтернатива му даде овластување на Гаши да преговара со Заев и со неговиот потенцијален наследник за влез во Владата
Премиерот Зоран Заев и претседателот на Алтернатива, Африм Гаши, денеска ќе имаат нова средба околу модифицирањето на владината коалиција.
Средбата следува откако Централното претседателство на Алтернатива му даде овластување на Гаши да преговара со Заев и со неговиот потенцијален наследник за приклучување на оваа партија кон парламентарното мнозинство, односно за влез во Владата.
Заев и Гаши имаа средба на 19 ноември, кога не постигнаа конкретен договор за соработка, ама ги најавија состаноците на партиските тела, што првично требаше да заседаваат во вторникот минатата недела, ама беа одложени за во петок поради автобуската трагедија во Бугарија.
Централниот одбор на СДСМ во петокот закажа вонредни внатрепартиски избори откако беше констатирана оставката на Заев на премиерската функција. По овој чекор, прашање е дали и кога Заев ќе поднесе оставка во Собранието на премиерската функција, со оглед на настојувањата на вториот коалициски партнер во Владата – ДУИ тој да го истера до крај мандатот на чело на Владата.
Во изјава за Телма, Заев рече дека прво треба да завршат преговорите за парламентарното мнозинство со Алтернатива.
„Ако тоа се заврши и јавно објави, ќе се направи проценка, со стабилно и зголемено парламентарно мнозинство, кога да се влезе во парламентот со постапка за избор на Влада со Алтернатива, а во зависност од преговорите со Бугарија. Една од најзначајните причини поради кои Алтернатива би влегла во Влада е да обезбеди стабилна Влада и стабилно мнозинство поради почетокот на преговори со ЕУ“,
изјави Заев.
По седницата на Централниот одбор на СДСМ во петокот, од главната владејачка партија излегоа со тврдење дека парламентарното мнозинство е стабилно и во овој момент и дека брои 61 член.