Премиерот најави дека веднаш по изборите ќе се почне со разговори и преговори на политички основи
Пратениците на седницата на собраниската Комисија за надворешна политика најверојатно ќе бидат информирани за деталите од размената на идеи меѓу работните групи и министрите за надворешни работи на Северна Македонија и Бугарија, за нон-пејперот, нашето последно размислување, но и нивната реакција која следуваше како одговор на нашиот акциски план, најави денеска премиерот Зоран Заев по рочиштето за судскиот спор меѓу него и Зоран Божиновски, кого премиерот го тужи за клевета.
Во координација со претседателот на собраниската Комисија за надворешна политика ќе биде договорен точен термин за одржување на седницата, но за точната содржина на она за што ќе се разговара Заев упати на министрите.
Тој само кусо најави дека процесот на официјални преговори е завршен и очекува дека сега ќе следува процес на реализација на акцискиот план, а веднаш по изборите во Бугарија ќе се почне со разговори и преговори на политички основи.
„Секогаш пред избори навистина е нерационално и невнимателно да се преговара за политички теми. Но можеме да работиме на акцискиот план, инфраструктурата, спортот, образованието, информатичкото општество, туризмот и други обврски, кои се на двете страни, со цел да го јакнеме пријателството меѓу двете земји“,
нагласи Заев.