Претседателот на СДСМ Зоран Заев на својот Фејсбук профил порача дека треба „да бидеме горди на ова наше Скопје“ и дека градот треба да биде „водилка и потсетник да продолжиме да градиме заедништво и солидарност“. Пораката е по повод 57 годишнината од катастрофалниот скопски земјотрес.
„26 јули 1963 година е денот чија зора наместо будење, нов ден и нова надеж за Скопје и скопјани донесе траор, плач, неверување и 1 070 погинати сограѓани.
57 години после катастрофалниот земјотрес, споменот за настраданите живее, онолку силно колку и споменот за солидарноста со која светот му подаде рака на Скопје.
Вечна им слава на жртвите на овој тажен ден.
Скопје се издигна од пепелта и стана симбол на несебичната поддршка и на заедништвото.
Да бидеме горди на ова наше Скопје, нека ни биде водилка и потсетник да продолжиме да градиме заедништво и солидарност!
напиша Заев.
Пораки по повод годишнината на земјотресот од 1963 година веќе испратија и премиерот Оливер Спасовски и претседателот на државата Стево Пендаровски.
Во градот се одржуваат повеќе манифестации со кои се одбележува годишнината од земјотресот.