Во атарот на ресенското село Долно Дупени биле пронајдени череп и остатоци од човечки труп во фаза на распаѓање. По наредба на јавен обвинител предадени се на Одделението за судска медицина при ЈЗУ Клиничка болница – Битола. Ивршена е идентификација и утврдено е дека жртвата е Мустафа Азис од Горно Количани кој бил застрелан со проектил од огнено оружје во пределот на тилот. Осомничен за убиството е жител на Скопје.
Основното јавно обвинителство Битола донесе Наредба за спроведување истражна постапка против едно лице од Скопје поради постоење основано сомнение за кривично дело – убиство од член 123 став 1 од Кривичниот законик.
Како што соопшти обвинителството, на 30 јуни, осомничениот скопјанец, во местото Големи Грми во атарот на селото Долно Дупени, Ресен, со употреба на огнострелно оружје, со умисла го лишил од живот лицето Мустафа Азис од Горно Количани.
„Поведената истражна постапка е во врска со пронајден череп и остатоци од човечки труп во фаза на распаѓање, во атарот на Долно Дупени на 27 и 28 јули. Пронајдените остатоци, по наредба на јавен обвинител, беа предадени на Одделението за судска медицина при ЈЗУ Клиничка болница – Битола каде беше извршена идентификација на починатиот и се утврди дека причината за смрт е насилна и предизвикана од проектил на огнострелно оружје испукан во пределот на тилот на жртвата“,
соопшти Обвинителството.
Основното јавно обвинителство Битола, поради опасност од бегство и можност за попречување на постапката и прикривање на доказите, поднесе предлог за определување мерка притвор за осомниченото лице.