Одлуката на МОН е согласно барањето на Сојузот на средношколци, изјави денеска министерот за образование и наука Јетон Шаќири и посочи дека во Законот за средно образование не е одредена законска обврска за точен број работни денови како што тоа е предвидено во Законот за основно образование
Тековната учебна година за средношколците ќе заврши на 10 јуни, а за основците на 17 јуни, а не според првичниот календар за организација на наставата според кој и за учениците во основното и за оние во средното образование учебната година требаше да трае заклучно со 17 јуни.
Одлуката на МОН е согласно барањето на Сојузот на средношколци, изјави денеска министерот за образование и наука Јетон Шаќири и посочи дека во Законот за средно образование не е одредена законска обврска за точен број работни денови како што тоа е предвидено во Законот за основно образование.
„Сите одлуки се донесуваат во консултација со тие што се засегнати. Сојузот на средношколци побара освен пролетниот распуст заради административните постапки на запишување на децата во високото образование, средното образование да заврши на 10 јуни. Тоа го дозволуваше Законот и ние тука постапивме“,
изјави Шаќири одговарајќи на новинарско прашање на денешната прес-конференција.
Одлуката за пролетен распуст и за основците и за средношколците од 29 април до 6 мај останува во сила.
Шаќири вели дека засега не е разгледано како ќе се надомести наставата на двата неработни дена – едниот на 24 април, а вториот на 8 мај, кога ќе се одржат претседателските и парламентарните избори.
„Ќе треба да се разгледа како може да се постапи за тие два дена кои се предвидени во календарот на вкупен број денови годишно за реализација на наставата. Ќе известиме навремено кога ќе има владина одлука за тоа“,
изјави министерот Шаќири.
Основците и средношколците во моментов се на зимски распуст, а на настава ќе се вратат в понеделник.