Министерот за внатрешни работи соопшти и дека денеска е завршена обдукцијата на телата на сите загинати во пожарот во дискотеката во Кочани
Три дена по пожарот во дискотеката во Кочани, за случајот досега приведени се 18, а задржани 16 лица. Разговори се извршени со 71 лице, од кои со 42 во Скопје и 29 лица во Кочани, информира попладнево на прес-конференција, министерот за внатрешни работи Панче Тошковски.
Како што информира тој, на 14 лица им е изречена мерка краткотраен притвор. Од Јавното обвинителството на Република Северна Македонија, пак, соопштија дека мерка краткотраен притвор им е изречена на 16 лица. Прашан за оваа разлика во бројот на притворени лица, Тошковски рече дека до моментот на изготвување на информацијата што тој ја соопшти биле 14, но дека во меѓувреме е можно бројот на лицата на кои им е одреден краткотраен притвор да е зголемен.
Според информациите што ги соопшти тој, на 11 лица им е одредена мерка притвор поради постоење основано сомнение за сторени тешки дела против општата сигурност, додека на три лица им е одреден притвор за несовесно работење.
Тошковски, на прес-конференција пред управната зграда на МВР информира дека последното задржано лице се товари за кривичното дело тешки дела против општата сигурност, а во врска со предизвикување општа опасност. Ова лице, како што кажа, е потписник на еден од потребните документи за ставање во функција на кабаре-клубот во Кочани.
„Постојат основи коишто одат во насока дека незаконито, паушално, без утврдување на фактичка состојба биле изготвувани круцијални документи, коишто биле предуслов во понатамошната постапка за ставање во функција за предметното кабаре“,
изјави Тошковски.
Во врска со преземените активности, тој повтори дека се извршени претреси кај две лица вработени во Министерството за економија, при што се одземени техничка опрема, документација, оружје, муниција. Претреси се извршени и кај управителот и одговорното лице на дискотеката, а денеска полициски службеници од Одделот за крим-полиција и организиран криминал, како што кажа министерот, влегле и во Општина Кочани, каде, како што посочи, се преземаат мерки и активности за обезбедување на документација поврзана со дискотеката.
Тошковски информира и дека денеска е завршена обдукцијата на телата на сите загинати во пожарот во дискотеката во Кочани.
Во пожарот во дискотеката животите ги загубија 59 лица.
Министерот, исто така, информира и дека во трагедијата се повредени вкупно 196 лица. Од нив, како што кажа, 93 се наоѓаат на лекување во скопските клиники, а 80 се пренесени во болници во странство.
Инаку, од Јавното обвинителство на Република Северна Македонија попладнево потврдија дека врз основа на обезбедените докази се испитува улогата на 16 лица за кои обвинителството побара и обезбеди мерка 48-часовен притвор.
Оттаму соопштија дека денеска бил извршен претрес во просториите на Општина Кочани и дека попладнево до надлежниот суд, Основното јавно обвинителство Кочани ќе достави предлог за определување краткотраен притвор за уште едно лице.