Законот предвидува казна од 2 000 до 4 500 евра за правното лице, за одговорното лице од 500 до 1 000 евра, а со 100 до 300 евра се казнува и физичкото лице што ќе биде фатено како пуши во затворен објект
Инспекторите од Државниот пазарен инспекторат (ДПИ) во рок од пет дена, (од 10 до 14 јануари), направиле вкупно 200 инспекциски надзори на територијата на целата држава, при што изрекле 56 казни за пушење во затворени објекти.
Непочитувањето на членот 2 и 3 од Законот за заштита од пушењето, велат од ДПИ, предвидува казна од 2 000 до 4 500 евра за правното лице, за одговорното лице од 500 до 1 000 евра, а физичкото лице што ќе биде фатено како пуши во затворен објект предвидена е парична казна од 100 до 300 евра, во денарска противвредност.
„Државниот пазарен инспекторат постапува по над 80 закони и подзаконски акти и одлуки донесени од страна на Владата, меѓу кои и Законот за заштита од пушењето. Заради зголемениот број на пријави од страна на граѓаните за пушење во јавните простории согласно член 2 од Законот за заштита од пушењето, напоменуваме дека согласно член 3 од истиот Закон, пушењето е дозволено исклучиво надвор од деловниот објект (тераса, летна бавча и слично) па согласно тоа, Државниот пазарен инспекторат како и до сега така и од сега ќе продолжи со интензивни контроли врз субјектите со цел контрола врз почитувањето на законските одредби“,
порачуваат од ДПИ.
Оттаму напоменуваат дека казните се високи и затоа, како што велат, апелираат правните субјекти да го почитуваат Законот, а граѓаните да го искористат законското право и да поднесат пријава до Инспекторатот доколку забележат прекршување на законот.