Меѓутоа, претседателот потсети дека рускиот претседател Владимир Путин ги користи Руската православна црква и црковната дипломатија на Русија како една од своите алатки за да ја оправда војната во Украина а тоа, како што рече, тој не би го поддржал
Сè што се движи во рамки на таканаречената црковна дипломатија меѓу Руската православна црква и Македонската православна црква е во ред и јас немам проблем со тоа. Ова е ставот на претседателот Стево Пендаровски кој одговарајќи на новинарски прашања ја коментираше посетата на рускиот митрополит Антониј на земјава и неговата средба со поглаварот на МПЦ-ОА, архиепископот охридски и македонски г.г. Стефан.
„Посетата до овој момент колку што можам да видам помина исклучиво во таа т.н. црковна дипломатија. Бидејќи знаете дека Руската православна црква ја призна Македонската православна црква и во тој контекст сè што се движи во таа рамка јас немам проблем. Не мислам дека ја руши државата“,
рече Пендаровски во одговор на новинарско прашање по отворањето на Амбасадорска тркалезна маса „Западниот Балкан помеѓу Западот и Истокот: Северна Македонија членка на ЕУ до 2030 година“.
Меѓутоа, претседателот потсети дека рускиот претседател Владимир Путин ја користи Руската православна црква и црковната дипломатија на Русија како една од своите алатки за да ја оправда војната во Украина а тоа, како што рече, тој не би го поддржал.
„Ако црковната дипломатија за која неспорно знаеме дека Путин ја користи како една од своите алатки во светот за да ја оправда војната во Украина и да ги оправда оние ѕверства што ги прави таму, тогаш јас тоа не би го поддржал. Но, до овој момент мислам дека средбите беа само во рамки на црквата и се разговараше само за црковни прашања“,
заклучи Пендаровски.
Рускиот митрополит Антониј задолжен за дипломатските односи на Руската православна црква (РПЦ) од вчера е во тридневна посета на земјава. Тој вчера оствари средба со поглаварот на МПЦ-ОА, г.г. Стефан во седиштето на архиепископијата во Скопје.
Во куса изјава за медиумите, митрополитот Антониј рече дека дошол во Скопје со братски пораки и поздрави од рускиот патријарх за лично да му го честита именденот на г.г. Стефан кој беше на 9 јануари.
Портпаролот на Синодот на МПЦ-ОА, митрополитот дебарско-кичевски Тимотеј, кажа дека средбата меѓу рускиот митрополит и поглаварот на МПЦ била пријателска, но не откри за што точно станало збор на неа. Тој негираше дека средбата била тајна, иако за неа официјално не објавија ниту нашата ниту, пак, руската црква, а за посетата се дозна од бугарските медиуми.
За денеска е предвидено е архиепископот Стефан и митрополитот Антониј да одржат заедничка архијерејска литургија во Лесновскиот манастир.