Процесот на пристапување кон ЕУ никогаш не се сведувал на датуми, а од друга страна, тоа мора да се случи низ остварливи рокови во сите фази од процесот, вели генералната секретарка на Регионалниот совет за соработка
На прашањето кој е виновен што Македонија и Албанија се уште не добиле конкретен датум за отпочнување преговори, Брегу порача дека „за кавга и за танго се потребни двајца“
Државите од Западен Балкан мора да се носат со проблемите на корупцијата институционално, но и како опшштество, граѓаните мора да го сменат однесувањето и да престанат да мислат дека е нормално да се даде подарок некому кој само ја извршува својата работа, вели генералната секретарка на Регионалниот совет за соработка(РСС), Мајлинда Брегу.
Во интервју во подгоричкиот весник „Вјести“, Брегу вели дека корупцијата била и се уште е голем проблем во западно балканските општества на патот кон ЕУ.
Во 2015 година 15 отсто од грѓаните ја гледале како најголем проблем, додека во 2021, тој процент изнесува 26 отсто, посочува таа и вели дека тоа е огромен пораст кој е очигледно предизвикан од евидентниот пораст на видливо присутната корупција со која се соочуваат граѓаните.
„Мора да престане да биде прифатливо луѓето да бараат врски или да плаќаат поткуп кога нешто им треба. Ние како општество мора тоа да го осудиме. А посебно оние на високи позиции и на позиции на моќ. Во регионот тоа се вика „ги знам вистинските луѓе“, односно луѓе кои по примањето поткуп можат да завршат одредена работа. Ова посебно се однесува на правдата и можноста да се потпрете на независно правосудство. Сега во 2021 година 54 отсто од луѓето на Западен Балкан, од кои 76 отсто сметаат дека правосудството е корумпирано, сметаат дека „познавањето на вистинските луѓе“ е пресудно за напредок во животот. Тоа е она што луѓето го гледаат и кон што тежнеат и ако не го најдат дома, подготвени се да го бараат на друго место. Да заминат во ЕУ поединечно“,
вели Брегу.
Што се однесува до прашањето кој е виновен што Албанија и Северна Македонија се уште не добиле конкретен датум за отпочнување преговори, Брегу смета дека „за кавга и за танго се потребни двајца“.
ЕУ и Западен Балкан се свесни дека се „предодредени едни за други“, бидејќи,како што вели, делат историја, култура, географија и демографија. Сепак, овие заднички обележја не се доволни, додава Брегу, бидејќи тоа често се доведува под искушение од огромните предизвици кои се присутни на Западен Балкан – економски, безбедносни и демографски.
„Секако би било потребно мало прилагодување од двете страни за да може овој дует да се усогласи…Поттик би можел да се најде во ставовите на граѓаните од регионот: Според Балканскиот барометар, 24 отсто од нив веруваат дека пристапувањето во ЕУ ќе се случи до 2025 година, 40 отсто веруваат дека тоа ќе се случи до 2030 година, а 22 отсто сметаа дека тоа нема да случи никогаш. Меѓутоа, процесот на пристапување кон ЕУ никогаш не се сведувал на датуми, а од друга страна, тоа мора да се случи низ остварливи рокови во сите фази од процесот“,
вели Брегу.
Без оглед на целиот процес, Брегу потсети на огромниот успех со укинувањето на роамингот за регионот и на огромните можности што се нудат со остварување на проектите за Заеднички економски пазар и другите интеграциски процеси меѓу државите од Западен Балкан.