Едностраните трговски акции на земјите членки на Европска Унија се неприфатливи за Европската Комисија, пренесе Ројтерс повикувајќи се на писмена изјава на портпаролот на ЕК. Изјавата следува откако Полска и Унгарија забранија увоз на жито и други земјоделски производи од Украина.
„Свесни сме за мерките што ги објавија Полска и Унгарија за забраната за увоз на жито и други земјоделски производи од Украина. Во овој контекст, важно е да се нагласи дека трговската политика е исклучива надлежност на ЕУ и затоа едностраните дејствија се неприфатливи,“
се наведува во изјавата од ЕК.
Унгарскиот министер за земјоделство Иштван Наѓ денеска изјави дека Унгарија привремено го суспендира увозот на жито и други прехранбени производи од Украина.
„Владата е посветена на застапување на интересите на унгарската земјоделска заедница, поради што во отсуство на значајни мерки на ЕУ, привремено го забранува увозот на житарки и маслодајни семиња со потекло од Украина,“
изјави Наѓ.
Вчера и Полска забрани увоз на жито и друга храна од Украина.
„Полската забрана за увоз на жито и други прехранбени производи ќе се применува и за нивниот транзит низ земјата“,
изјави полскиот министер за развој и технологија, Валдемар Буда.
Големи количества украинско жито, кое е поевтино од тоа што е произведено во Европска Унија, заврши во Полска и други централноевропски земји, што доведе до намалување на цената и ја погоди продажбата на локалните земјоделци. Од Полска порачаа дека остануваат пријатели сојузници со Украина и дека се подготвени да почнат преговори за проблемот со житото.