За две години на територијата на државава се документирани 16 смртни случаи на бегалци и мигранти, покажуваат податоците на Агенцијата на ОН за бегалци УНХЦР.
Од канцеларијата на УНХЦР во Скопје повикуват на зајакната заштита на луѓето кои се движат во потрага по безбедност.
„Претставништвото на УНХЦР во Скопје е исто така загрижено околу бројот на смртни случаи на територијата на Северна Македонија: во 2019 година беа документирани девет, а оваа година досега се бројат уште седум жртви на овие сурови патишта. На 30 јули, Светскиот ден против трговијата со луѓе, повикуваме на зајакната заштита на луѓето кои се движат во потрага по безбедност“,
стои во сопштението на Канцеларијата на УНХЦР во Скопје.
Собирањето точни податоци за смртните случаи во контекстот на рутите за движење кои се во контрола на трговците и криумчарите на луѓе е неверојатно тешко, велат од УНХЦР. Голем дел од транзитот се случува „во сенка“ и далеку од погледите на властите и нивните формални системи за менаџирање на податоците.
„Сепак, резултатите на извештајот кој се темели на програмата за собирање на податоци на Центарот за мешани миграции ММЦ, како и податоци од дополнителни извори, велат дека најмалку 1 750 лица загинале на овие патувања во 2018 и 2019 година. Ова укажува на најмалку 72 смртни случаи месечно, што ја прави оваа рута една од најсмртоносните бегалски и мигрантски рути во светот. Овие смртни случаи се згора на илјадниците кои починале или исчезнале последниве години во обидите за очајнички патувања преку Средоземното Море до Европа, откако стасале до северниот африкански брег“,
се наведува во сопштението