Денеска ако се попушти пред закани и уцени, утре ќе си дозволи секој да блокира. Не се попушта пред уцени кога знаете дека сте во право, вели градоначалничката
Не се преговара со луѓе што уценуваат и навредуваат и кои тоа го прават зашто вистината не е на нивна страна. Нема да се подлегне на закани и уцени по ниту една цена. Денеска ако се попушти пред закани и уцени, утре ќе си дозволи секој да блокира. Не се попушта пред уцени кога знаете дека сте во право, рече градоначалничката на Скопје Данела Арсовска за тоа дали ќе има договор со приватните превозници кои дадоа рок до петок или повторно ќе го блокираат сообраќајот во главниот град.
Колатералната штета што им се предизвикува на граѓаните е со име и презиме, а тоа не е во Градот Скопје, потенцираше Арсовска во вечерашната „Топ тема“ на ТВ Телма.
„Градот Скопје не го предизвикува овој хаос. Нема да се подлегне на закани и уцени по ниту една цена. ЈСП, до моментот на овие ситуации, им има исплатено отприлика 156 милиони денари од кои 111 милиони на „Слобода превоз“ и 45 милиони на „Макекспрес“, колку што и биле нивните побарувања заклучно со последниот месец. Зошто досега, доколку тие имале некакво побарување, не испратиле ниту една опомена пред тужба. Нема ниту една. Дали тоа не е индиција за нешто, каде е долгот, ако не опомениле“,
нагласи Арсовска.
Арсовска потенцира дека е отпочната сериозна истрага и активно се води и ревизија.
„Детектирани се состојби кои не соодветствуваат со тоа што се одвива на терен и затоа ќе има сериозна истрага и ревизија. Има институции, како УЈП и Финансиската полиција, кои се надлежни за тоа. Доколку сакаме да има промени во општеството мора да ги завршиме до крај“,
додаде градоначалничката.
Според Арсовска двете здруженија имале склучено договори со Градот Скопје, а преку Градот и со ЈСП, но и едното и другото здружение дозволиле да се раскинат поради непочитување на одредбите од договорот.
„Причина за раскинот не е Градот, туку нивното непочитување на договорните обврски“,
истакна Арсовска.
Таа објасни дека за едното здружение раскинувањето на договорот што го имаат склучено на крајот на минатата година, е согласно членот 29, а тоа е дека не обезбедувале превоз на линиите во договорениот обем и тоа најмалку 80 отсто во текот на повеќе календарски месеци.
„Прво, треба да се погледнат причините зошто го прават тоа, второ, несомнено е дека сакаат да направат привид на хаос. Трето, она што е значајно за нас, е дека договорите се раскинати не по наша вина, туку затоа што некој не си ги почитиувал одредбите на оној договор кој што го имал склучено“,
изјави Арсовска.
Град Скопје, како што нагласи Арсовска, понудил, преку нов јавен повик, под соодветни услови, секој да може да аплицира во Градот и директно да работи и да си заработува чесно.
„Ова што го видовме со овие здруженија и ова што се случуваше во изминатите месеци е далеку од тоа. Ние ќе оставиме на институциите да пристапат и истражат што се случувало“,
додаде Арсовска.
Таа порача дека Министерството за внатрешни работи е одговорно да го регулира сообраќајот и дека има позадина тоа што некој сака да направи привид на хаос.
„До каде ќе стигнеме ако секој што има возило или автобус излезе и блокира. Секој ќе си го дозволи истото. Овој проблем бара системско решение кое изгледа некому не му одговара“,
рече градоначалничката.