Вучиќ се сретна со Лајчак во време кога повторно се зголемија тензиите меѓу Белград и Приштина поради несогласувањата околу задолжителната пререгистрација на возилата со српски регистарски таблички на Косово
Претседателот на Србија, Александар Вучиќ, денеска во Белград се сретна со специјалниот претставник на ЕУ за Западен Балкан, Мирослав Лајчак.
„Средба со Мирослав Лајчак, специјалниот претставник на Европската унија за дијалог меѓу Белград и Приштина и други регионални прашања на Западен Балкан“,
напиша Вучиќ на Инстаграм поставувајќи заедничка фотографија.
Вучиќ се сретна со Лајчак во време кога повторно се зголемија тензиите меѓу Белград и Приштина поради несогласувањата околу задолжителната пререгистрација на возилата со српски регистарски таблички на Косово.
Претходните денови повторно ескалира спорот за регистарските таблички. Српската листа, најсилната партија на северот на Косово, најави можност сите Срби да ги напуштат косовските институции на северот на Косово поради суспензијата на директорот на северната регионална дирекција на косовската полиција, Ненад Ѓуриќ. кој одби да ја спроведе одлуката на косовската влада за предупредување на сопствениците на возила со српски регистарски таблички.
Тема на разговорот меѓу Вучиќ и Лајчак најверојатно ќе биде одговорот на Србија до Европската унија за германско-францускиот предлог за нормализирање на односите меѓу Белград и Приштина, кој беше доставен до Брисел.
Вучиќ најави дека утре ќе присуствува на седницата на Владата на Србија на која ќе се разговара за ситуацијата на Косово.