Со зголемениот број тестирања ќе се види колку заразени лица влегле од странство. Српскиот претседател рече оти стравува дека тоа е ужасно голема бројка
Српскиот претседател Александар Вучиќ, говорејќи за ширењето на коронавирусот, изјави дека очекува од денеска да почне да се зголемува бројот на заразени лица во Србија, меѓу другото, и затоа што со новата стратегија ќе се зголеми бројот на тестирани лица.
Како што јави МИА од Белград, Вучиќ изјавил дека за десетина дена бројката на тестирани може да биде 3 000, но оти ова е најдобриот начин да се задржи пандемијата и да се спречи вирусот да се шири на што повеќе луѓе.
„Тоа е нешто со што треба да се справиме и подобро е да го сториме тоа што е можно поскоро. Имаме поголем број лица на респиратори и затоа е важно да се спречи со вирусот да се заразат уште многу луѓе“,
рече Вучиќ додавајќи дека е договорено со кинеските експерти да се постави голема лабораторија, која ќе може да направи 2 000 тестови на ден.
Вучиќ повтори дека денеска е далеку најтешкиот ден, со најмногу тестирани, и дека утре ќе биде уште полошо.
„Првпат ќе имаме прецизна слика за тоа колку заразени лица влегле од странство. Се плашиме дека тоа е ужасно голема бројка“,
рече Вучиќ.
Тој порача дека надлежните наскоро ќе излезат со нови мерки за Белград, Ниш и Валево, како градови кои се најголеми жаришта на коронавирусот.
Во врска со веќе подготвениот карантин на Белградскиот саем со 3 000 лежаи, тој порача дека сите ќе мора да одат таму ако имаат вирус.
„Некој тука ќе треба да помине 14 или 21 ден и не ме интересира што нема да му биде комфорно. Ние се бориме за животите на луѓето. А, ако некој мисли дека ќе се шминка или ќе мие заби четири пати на ден, нема да може. Ќе ги мие забите еднаш дневно“,
нагласил српскиот претседател.