На прашањето како ќе одговори на опозиционерите кои го оспориле неговиот легитимитет, српскиот претседател рече дека ќе предложи поведување уставна процедура
Претседателот на Србија и лидер на Српската напредна партија (СНС), Александар Вучиќ, вечерва најави дека на партиското собрание на 27 мај ќе се повлекува од челната позиција на партијата. Тој посочи дека не знае кој ќе биде негов наследник, бидејќи во игра биле три-четири имиња и додаде дека планира да формира ново народно движење за Видовден, на 28 јуни.
„Верувам дека на 27 мај ќе избереме ново раководство на СНС. Оттогаш не би требало да бидам претседател. Околу Видовден го формирам Народното движење за Србија, но останувам член на СНС, иако се надевам дека ќе избереме ново раководство. Тоа движење ќе биде пошироко од СНС и би сакал да ги вклучам и оние луѓе кои не се во СНС. Сè уште не знам кој ќе ме замени на чело на партијата, но знам дека дел од оние што останаа без позиции ќе си заминат од СНС“,
изјави Вучиќ во интервју за телевизијата Прва, јавува Данас.рс.
На прашањето како ќе одговори на опозиционерите кои го оспориле неговиот легитимитет, српскиот претседател рече дека ќе предложи поведување уставна процедура.
„Им требаат две третини пратеници, нека се соберат сите 85, а од СНС ќе додадам колку им треба. Кога ќе изгласаат дека мојот легитимитет е доведен во прашање, ќе излеземе на референдум да видиме дали народот сака смена на претседателот. Ќе бидам претседател се додека народот ме сака, а кога народот ќе мисли дека сум предавник, крадец и дека не се борам за нивните интереси, тогаш ќе престанам да бидам претседател“,
рече Вучиќ.
Тој оцени дека дури и оние што го мразат го почитуваат и дека имајќи го тоа предвид, веќе знае какви ќе бидат резултатите доколку има референдум.
Вучиќ најави дека во меѓувреме неколкумина од СНС кои останале без државни функции бомбастично ќе објават дека ја напуштаат партијата.
Како што објасни, тоа се луѓе кои припаѓаат на „менаџмент естаблишмент“ и кога не се на функција се лутат на целиот свет.