Српскиот претседател и лидер на Српската напредна странка (СНС) му предложил на изборниот штаб на партијата да ги откаже сите предизборни собири, вклучително со големиот митинг најавен во Нови Сад и завршниот митинг во Ниш, јавува „Блиц“.
Како што пренесува порталот, лидерот на СНС се решил на овој потег за да не го загрози здравјето на граѓаните.
Првиот таков собир требаше да се одржи утре во Нови Сад, каде што се очекувало присуство на најмалку 30 илјади поддржувачи на владејачката партија во Србија.
Вучиќ го изнел овој предлог и покрај тоа што, како што наведува „Блиц“, епидемиолошката ситуација во Србија е далеку од драматична, и покрај тоа што ставот на епидемиолозите е дека не треба да се забранат масовни собири, за што потврда беше и дербито меѓу Црвена Ѕвезда и Партизан.
Изборите во Србија ќе се одржат на 21 јуни, откако еднаш беа одложени поради епидемијата, односно требаше да се одржат на 26 април.