Нов министер за внатрешни работи ќе биде Братислав Гашиќ, актуелен директор на БИА и поранешен министер за одбрана. Во одбрана, пак, доаѓа Милош Вучетиќ, кој ќе биде и потпретседател на владата. Ивица Дачиќ се враќа за шеф на дипломатијата, а актуелниот Никола Селаковиќ ротира во министер за труд
Поминаа повеќе од шест месеци од изборите во Србија, а имињата на министрите во владата и станаа познати на јавноста непосредно пред истекот на законскиот рок за состав на новата влада. Ги соопшти Александар Вучиќ на состанок на Главниот одбор на Српската напредна партија.
Во ресорите внатрешни работи и одбрана седнуваат нови кадри на местото на Александар Вулин и Небојша Стефановиќ. Нов министер за внатрешни работи ќе биде Братислав Гашиќ, актуелен директор на БИА и поранешен министер за одбрана. Во одбрана, пак, доаѓа Милош Вучетиќ, кој ќе биде и потпретседател на владата.
Покрај Вучетиќ, првпат министри ќе бидат: Раде Баста, министер за економија, Јелена Танасковиќ, министер за земјоделство, шумарство и водостопанство, Горан Весиќ, министер за градежништво, транспорт и инфраструктура, Дубравка Негре, министер за рударство и енергетика, Александар Мартиновиќ, министер за државна администрација и локална самоуправа, Томислав Жигманов, министер за човекови и малцински права и социјален дијалог, Тања Мишчевиќ, министер за евроинтеграции, Јелена Беговиќ, министер за наука, технолошки развој и иновации, Даница Грујиќиќ, министер за здравство, Хусеин Мемиќ, министер за туризам и млади и Зоран Гајиќ, министер за спорт.
Членови на владата остануваат, но ротираат во друг ресор: Ивица Дачиќ, вицепремиер и министер за надворешни работи, Синиша Мали, вицепремиер и министер за финансии, Томислав Момировиќ, министер за внатрешна и надворешна трговија, Ирена Вујовиќ, министер за заштита на животната средина, Маја Поповиќ, министер за правда. Бранко Ружиќ, министер за образование, Никола Селаковиќ, министер за труд, ветерани и социјални работи, Дарија Кисиќ, министер за семејна грижа и демографија, Маја Гојковиќ, министер за култура и Милан Кркобабиќ, министер за заштита на селото.
Покрај Вулин и Стефановиќ – Бранислав Недимовиќ, Зорана Михајловиќ, Вања Удовичиќ, Златибор Лончар, Јадранка Јоксимовиќ и Марија Обрадовиќ повеќе нема да се на министерски позиции. Според Вучиќ, тие ќе продолжат да работат во партијата, а некои од нив ќе имаат посебни должности.
Според зборовите на претседателот на Србија и на СНС, владата ќе ги презими оваа и следната зима. Ана Брнабиќ во вторник на 25 октомври треба да го претстави своето експозе пред Народното собрание.