Српскиот претседател рече дека добиле известување од Азербејџан дека поради проблемите што ги имаат нема да може да ја продолжат испораката на гас за Србија, а оти не се знае ниту кога би можела да продолжи
Српскиот претседател Александар Вучиќ денеска изјави оти Србија повеќе нема да може да смета на 1,7 милиони кубни метри гас од Азербејџан, колку што оваа земја ѝ испорачува на дневна основа.
На денешната прес-конференција, тој рече дека добиле известување од Азербејџан дека поради проблемите што ги имаат нема да може да ја продолжат испораката на гас за Србија, а оти не се знае ниту кога би можела да продолжи.
„Добив известување од нашите браќа и пријатели од Азербејџан дека поради виша сила и проблемите што ги имаат од денеска повеќе не можеме да сметаме на 1,7 милиони кубни метри гас што доаѓаа во нашата земја“,
рече Вучиќ на прес-конференцијата по средбата со американскиот заменик-државен секретар за управување и ресурси Ричард Верма.
Додаде дека од денеска Србија многу посериозно ќе почне да ги троши своите резерви.
„Сега излезе дека е паметно тоа што правевме резерви. Се надевам дека за еден-два месеца ќе го поправат ова. Ако не се случи тоа, сметајте дека во наредните четири месеци ќе мораме да ги потрошиме резервите“,
додаде српскиот претседател.
Вучиќ уверува дека во земјата нема да има недостиг на гас или нафта.
Одлуката на Азербејџан доаѓа еден ден откако САД ја ставија Нафтената индустрија на Србија (НИС) на листата на санкции поради таканаречениот „секундарен ризик“, односно поради поврзаноста со руски „Газпром нефт“.
Србија потпиша договор со Азербејџан за снабдување со природен гас во септември 2024 година, како дел од напорите за диверзификација на изворите на снабдување и намалување на зависноста од рускиот гас, на кој доминантно се потпира повеќе од четвртина век.