Претседателот на Републиката како врховен командант издаде наредба до Армијата на Србија да биде во готовност, да го подигне нивото на борбена готовност на ниво на кое може да одговори на секоја задача, изјави српскиот министер за одбрана
Српскиот министер за одбрана Милош Вучевиќ изјави дека по наредба на претседателот Александар Вучиќ, српската армија е ставена во состојба на готовност поради ситуацијата на Косово.
„Претседателот на Републиката како врховен командант издаде наредба до Армијата на Србија да биде во готовност, да го подигне нивото на борбена готовност на ниво на кое може да одговори на секоја задача. Србија е сериозна земја, ја презема одговорноста за сите можни проблеми. Не би рекол дека ова е решено, не можеш да бидеш јасен со Курти затоа што никогаш не се знае. Утрово го издале првото предупредување на Србин за регистарски таблички. Се чини дека не сакаат никаква ескалација, дека тоа има форма на дијалог, не можеме да бидеме опуштени, но сакаме дијалог. Војската на Србија е подготвена да ја изврши секоја задача на врховниот командант. Сега никој не е во војна“,
изјави Вучевиќ.
Тој додава дека кога Србија зборува за мир и стабилност, тоа не значи дека се слаби.
„Она што народот треба да го знае е дека српската армија е многукратно посилна отколку што беше, заслужува почит и дејствува во согласност со државните лидери. Треба да работиме на повисоко екипирање, посилно оружје, обука на резервните сили. Не се подготвуваме за војна, но не можеме да бидеме целосно неподготвени за се што ќе се случи“,
рече Вучевиќ.
Косовскиот министер за внатрешни работи Џељаљ Свечља изјави дека од 1 ноември косовската полиција ќе почне да го спроведува планот на Владата на Косово за автомобилите со српски регистарски таблички кои возат во земјата.
Овој план – во три фази – започнува да се спроведува од 1 ноември до 21 април 2023 година.
Регистарските таблички издадени од српските власти, Приштина ги смета за нелегални, но досега се толерираа на северот на Косово.
Планот на Владата на Косово беше објавен на 28 октомври, иако претходно имаше одлука дека 31 октомври е краен рок за пререгистрација на автомобилите со српски таблички во РКС.
По предупредувањето, втората фаза од планот за регистарски таблички предвидува глоба од 150 евра за сопствениците на автомобили со вакви таблички, почнувајќи од 21 ноември до 21 јануари.
Според одлуката на Владата, подоцна ќе се користат пробни регистарски таблички, а по 21 април автомобилите со овие таблички нема да можат да возат на Косово.
Од МВР за регионалниот сервис на Радио Слободна Европа (РСЕ) велат дека сите сопственици на автомобили со српски регистарски таблички до 30 март ќе можат да ги користат поволностите од пререгистрацијата на своите автомобили со таблички РКС.