Ова ќе биде втора јавна седница во највисокиот суд во државата во врска со продолжувањето на притворот на таткото на убиената Вања Ѓорчевска. Претходно Врховен одржа јавна седница на 13 март, на која адвокатот Владимир Туфегчиќ ги изнесе аргументите на одбраната зошто сметаат дека на Ѓорчевски треба да му биде укината мерката притвор. Во пресрет на јавната седница закажана за в четврток, адвокатот Туфегчиќ вели дека е оптимист и очекува Врховниот суд да донесе одлука со која ќе го укине притворот што Апелацискиот суд по службена должност му го продолжил на Ѓорчевски на 2 април
Во Врховниот суд в четврток повторно ќе се одржи јавна седница во врска со притворот на таткото на убиената Вања Ѓорчевска, Александар Ѓорчевски, кој е осомничен за вмешаност во грабнувањето на девојчето.
Јавната седница, како што соопштија денеска од Врховен, е на барање на осомничениот Ѓорчевски, а изјавена преку неговиот бранител, адвокатот Владимир Туфегџиќ.
Тој во изјава за „360 степени“ рече дека Апелацискиот суд Скопје на 2 април по службена должност го продолжил притворот на Ѓорчевски за нови 30 дена, по што тој го искористил рокот од 48 часа да поднесе жалба на одлуката на Апелација до највисокиот суд во државата, што му го овозможува Законот за кривична постапка.
Инаку, јавната седница во Врховниот суд, како што ни изјави тој, првично била закажана за денеска, но била одложена за в четврток. Ова, за „360 степени“ го потврдија и од Врховниот суд. Оттаму велат дека настан што го имале денеска бил причина за одложување на седницата.
„Врховниот суд на Република Северна Македонија ја известува јавноста дека по изјавената жалба на осомничениот А. Ѓ. од Скопје, преку неговиот бранител Владимир Туфегџиќ, адвокат од Скопје, против решението на Апелационен суд Скопје КСЖ-320/23 од 02.04.2024 година, по која е формиран предмет во Врховниот суд на Република Северна Македонија како ВКЖ1-14/24, на барање на одбраната закажана е јавна седница за 25.04.2024 година со почеток во 10 часот. Јавната седница ќе се одржи во судницата на првиот кат во Врховниот суд на Република Северна Македонија“,
се наведува во соопштението на Врховен, објавено на официјалната веб-страница.
Инаку, ова ќе биде втора јавна седница во највисокиот суд во државата во врска со продолжувањето на притворот на таткото на убиената Вања Ѓорчевска.
Претходно Врховен одржа јавна седница на 13 март, на која адвокатот ги изнесе аргументите на одбраната зошто сметаат дека на Ѓорчевски треба да му биде укината мерката притвор. Врховен, по околу два часа од одржувањето на седницата, соопшти дека Советот за кривични дела ја одбил како неоснована жалбата и го потврдил решението на Апелацискиот суд Скопје.
Во емотивно обраќање пред петчлениот Совет на Врховен, осомничениот Александар Ѓорчевски на 13 март, видно вознемирен и низ солзи, изјави дека е поделен на два света и оти единствено што му е важно е да дојде до разрешница на целиот случај.
„Јас сум поделен на два света – едното дете ми е тука, другото ми го одзедоа. Не ми е важно каде ќе ја дочекам разрешницата, важно ми е да има разрешница за да може да донесам одлука како возрасен човек дали ќе продолжам на овој или ќе се придружам на другиот свет“,
рече тогаш Ѓорчевски.
Во пресрет на јавната седница закажана за в четврток, адвокатот Туфегџиќ вели дека е оптимист и очекува Врховниот суд да донесе одлука со која ќе го укине притворот.
„Јас како адвокат сум оптимист бидејќи околностите и немањето докази се основа да очекувам позитивна одлука од страна на Врховниот суд, односно да ја укине мерката притвор“,
ни изјави Туфегчиќ.
Во своето излагање на претходната седница, образложувајќи ја жалбата на претходната одлука за продолжување на притворот на неговиот клиент, рече дека таа е во духот на Европската конвенција за човекови права бидејќи смета дека во случајот на неговиот клиент станува збор за одреден превентивен притвор, што е спротивно на членот 5 од Конвенцијата. Наведе дека Обвинителството досега не понудило ниту еден доказ што упатува на кривичното дело за кое се товари Ѓорчевски, како и на основаноста да му биде продолжуван притворот. Како што кажа адвокатот, образложенијата врз основа на кои му е продолжен притворот на Ѓорчевски биле аргументирани општо и апстрактно и оти не држат наводите за опасност од бегство, влијание на сведоци и повторување на кривичното дело од страна на Ѓорчевски, кој тоа воопшто не го извршил.
Обвинителката од републичкото јавно обвинителство Наталија Тасевска тогаш пред Судот рече дека Обвинителството предлага жалбата на Ѓорчевски да биде одбиена бидејќи истрагата сè уште трае, се вештачат телефонски разговори од кои се извлекуваат заклучоци дека осомничениот го сторил кривичното дело.
Инаку, за убиството на малата Вања Ѓорчевска и на велешанецот Панче Жежовски се осомничени пет лица меѓу кои и нејзиниот татко, кого истрагата на Основното јавно обвинителство Скопје го товари дека помогнал во грабнувањето на девојчето откривајќи им ја на сторителите рутината на нејзиното движење.
Првоосомничен за убиствата на Вања и на Жежовски е Љупчо Палевски-Палчо кој и понатаму е во Турција каде што беше уапсен на 5 декември и во моментов се чека негова екстрадиција во земјава.
Покрај Палевски, за случајот осомничени се и Велибор Манев, Влатко Кешишов и Боре Видевски, кои се товарат за по две кривични дела – убиство и грабнување.
Во случајот осомничено е уште едно лице, Стефан Димовски, кој се товари за кривичното дело помагање сторител по извршено кривично дело бидејќи го возел Палевски од Србија, преку Бугарија до Турција. Нему на 12 март му беше укинат притворот бидејќи како што образложија тогаш од Обвинителството поради видот на кривичното дело и предвидената казна не постои законска можност тој и понатаму да ја издржува оваа мерка за обезбедување присуство.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Велес и на Скопје на 3 декември.
Според информациите од истрагата што на прес-конференција ги изнесоа министерот за внатрешни работи Оливер Спасовски и шефот на скопското Основно јавно обвинителство, Гаврил Бубевски, девојчето било грабнато во влезот од зградата во која живеела, а потоа во вреќа за спиење била ставена во гепек на возило и однесена на локација надвор од Скопје, каде што е убиена.
Убиството на велешанецот, пак, се случило пет дена претходно, односно на 22 ноември. Според информациите што беа досега соопштени, тој бил избран од осомничените поради неговиот автомобил, кој потоа бил користен при грабнувањето на Вања.
На 22 декември лани од Основното јавно обвинителство Скопје соопштија дека ги добиле обдукциските наоди од Институтот за судска медицина, за кои рекоа дека нема да бидат објавени во јавност.