Основачот и администраторот на озлогласената група „Јавна соба“ од првостепениот и второстепениот суд беа казнети со по четири години затвор
Врховниот суд го одби како неосновано барањето за вонредно преиспитување на пресудата за случајот „Јавна соба“.
Одлуката била донесена на седница одржана вчера. Тоа практично значи дека и највисокиот суд ги потврди осудителните пресуди за предметот што ги добија креаторот и администраторот на озлогласената група на апликацијата Телеграм.
„Советот за казниви дела при Врховниот суд на Република Северна Македонија на седницата одржана на ден 29.03.2023 година одлучуваше по поднесените барања за вонредно преиспитување на правосилна пресуда по предметот познат во јавноста како ’Јавна соба‘. Советот за казниви дела при Врховниот суд на Република Северна Македонија донесе пресуда Квп2. бр. 23/2023 со која барањата за вонредно преиспитување на правосилната пресуда на Основниот кривичен суд Скопје К. бр.1851/21 од 11.03.2022 година и пресудата на Апелациониот суд Скопје КЖ. бр. 588/22 од 24.11.2022 година, ги одби како неосновани“,
соопштија од Врховен.
Основачот Дарко Костовски и администраторот на групата Михаил Паневски, во случајот се гонеа за кривично дело производство и дистрибуција на детска порнографија.
И од Основниот кривичен суд и од Апелацискиот суд во Скопје тие беа осудени на по четири години затвор.
Групата „Јавна соба“ беше креирана кон крајот на 2019 година и во неа се споделуваа фотографии и лични податоци од девојки и жени во земјава. За случајот имаше и протести на кои се бараше одговорност за креаторите, а Основното јавно обвинителство (ОЈО) Скопје отвори истрага и поднесе обвинение во април 2021 година.