Коалицијата на неколку партии на Албанците која е на власт ги повикува органите на прогонот да се ослободат од „оковите на претходниот режим“
За поранешниот министер за надворешни работи, велат дека направил злоупотреби при изнајмувањето возила за самиот на ОБСЕ во Скопје, за (не)преземените дејства во врска со амбасадорите Љубомир Фрчкоски и Весел Мемеди, за унапредувањето на поранешната водителка Бесмира Ејупи…
Коалицијата „Влен“, која ја дели власта по последните избори со ВМРО-ДПМНЕ и ЗНАМ, денеска претпладнево повика на кривичен прогон на доскорешниот министер од редовите на ДУИ, Бујар Османи. Како што велат во соопштението испратено до медиумите, „граѓаните не забораваат на злото што (ДУИ н.з.) го оставија зад себе“.
Во тој контекст, го повикуваат обвинителството на одговор по неколку теми кои беа актуелни во јавноста за време на министерувањето на Бујар Османи.
„Сомнежите на ВЛЕН се кога обвинителството ќе одговори на сите извештаи за можни злоупотреби на поранешниот министер кој за себе викаше дека има понуда да биде генерален секретар на НАТО, ‘пациентот’ Бујар Османи.
Јавноста со право прашува каде е одговорноста на Бујар кога на чело на МНР, спротивно на логиката на пазарот за потребите на Самитот на ОБСЕ, склучил договор од 960.000 евра со компанијата ‘ABC rent a автомобил’.
Јавноста со право прашува дали Бујар знаел за злоупотребите на амбасадорот испратен од него во Обединетите нации, Љубомир Фрчкоски.
Јавноста со право го поставува прашањето што презел Бујар кога амбасадорот Весел Мемеди направи хаос со пасошите, отежнувајќи им го животот на нашите иселеници.
Јавноста со право прашува како се случи преку ноќ Бесмира Ејупи да стане дипломат во конзулатот во Бон, дури и со негова директна наредба да ѝ се подготви дипломатски пасош“,
соопштија од „Вреди“
„Вреди“ не случајно го употребуваат зборот „пациент“ за Бујар Османи. Тој беше осомничен во истоимениот случај на СЈО, за злоупотреба на службената положба при избор на фирма за реконструкција на повеќе здравствени устанвои низ земјава. По 20 месеци, истрагата против Османи беше запрена поради недостаток на докази, но продолжи за други 13 лица.
Тендерот за изнајмување на возила за потребите на ОБСЕ, пак, предизвика контроверзии уште кога беше обелоденет. Но, набавката ја бранеше и тогашниот премиер Димитар Ковачевски, кој кажа дека станува збор за најголемиот настан кој го организирала земјава и на кој се очекуваат над 70 делегации.
Обвинувањата за злоупотреби од страна на одредени амбасадори се појавија последниве недели, по изборот на новата влада и назначувањето на Тимчо Муцунски за нов министер за надворешни работи и надворешна трговија. Љубомир Фрчкоски, кој е амбасадор во мисијата на ОН во Њујорк, беше повикан на консултации во земјава поради наводни финансиски малверзации и непостапување по добиените насоки. Тој возврати дека имал итна медицинска интервенција во Македонија и дека бил на погребот на својот починат брат, ненадејни настани кои го принудиле привремено да искористи пари од Мисијата за авиобилет. Обвинувањата ги нарече срамни и најави повлекување по завршување на боледувањето.
Амбасадорот во Италија, Весел Мемеди, според ТВ Канал 5 беше повикан на консултации поради доставената нота до италијанските власти, дека пасошите со старото уставно име на земјата нема да важат по 12 февруари. Освен што тоа не беше точно, постапката на Мемеди беше без координација и инструкции од официјално Скопје.
Ваквите барања на „Вреди“ доаѓаат по одлуката на ДУИ со помош на меѓународни експерти да извршат притисок кој ќе резултира со обврска при составот на секоја влада, во неа да влегува партијата која победила кај Албанците. Коалицијата околу интегративците освои повеќе пратеници на минатите избори, па партијата од Мала Речица смета дека им е одземено правото на Албанците да бидат соодветно претставени во институциите.
„Вреди“, од друга страна, ја брани тезата дека во коалицијата околу ДУИ имаше и партии на Ромите и Турците, без кои ДУИ не би освоиле толку пратеници. Па, сегашната власт е на мислење дека тие добиле повеќе гласови на Албанците.
„ВЛЕН далеку од гебелсовата пропаганда на ДУИ и нивните сателити кои чекаат по ходници да станат дел од Владата, докажува со ДЕЛА како може да се изгради праведно владеење, а ДУИ мора да се соочи со нивното мрачно минато.
Ги повикуваме органите на прогонот и обвинителството да се ослободат од оковите на претходниот режим и да ја вратат довербата на граѓаните и да преземат мерки“,
се вели во соопштението на „Вреди“.