Вработените во подружниците на Македонска пошта излегоа на протест, по 7 јуни најавија дека ќе организираат штрајк

Велигденов побара од новата влада да се заземе за интересот на Македонска пошта бидејќи, како што рече, 2 000 вработени ќе останат на улица и ќе биде единствен пример во светот државна пошта да не функционира, односно да не постои

Вработените во сите подружници на „Пошта на Северна Македонија“ денеска излегоа на протест на кој го изразија револтот и загриженоста за иднината на компанијата и за зачувување на своите работни места. Вработените велат дека Македонска пошта подолг период се соочува со огромна финансиска криза и со лоша организација на работењето, а со тоа е доведена до тотален хаос и до дното на опстојувањето.

Боро Велигденов, претседател на Синдикалните организации на Македонска пошта, најави дека протестот ќе продолжи, но оти веќе се во процес на штрајк, кој согласно законските регулативи треба да се одржи после 7 јуни.

„Како што најавивме минатиот месец, влегуваме во процес на штрајк бидејќи го допревме дното и немаме што да изгубиме како вработени. Согласно законските регулативи, штрајкот ќе се одржи после 7 јуни и ќе бидеме истрајни до крај, ќе се бориме за опстанок на македонска пошта“,

додаде Велигденов.

Протестот, како што рече Велигденов, не е само затоа што не земале плата, туку и за да се стабилизира Македонска пошта и понатаму да се зголеми продуктивноста во работењето со што ќе се генерираат поголеми приходи и така, додава Велигденов, ќе може самостојно да исплаќаат плата.

„Не знаеме кога ќе земеме плата поради тоа што немаме доволно финансиски средства, а и менаџерскиот тим нема одговор на тоа прашање, затоа што чекале некаков прилив. Македонска пошта е доведена до состојба на уништување, опстојувањето е под голем знак прашалник и бараме итна средба со новата влада и да ги решиме состојбите. Она што го бараме со години е да се отпочне веднаш и неодложно со новите реформи и целокупна реорганизација. Постапката за систематизација на новите работни места е темел и основа за понатамошна стабилизација и функционирање на друштвото“,

рече тој.

Вработените во Македонска пошта се заканија со штрајк доколку не ја добијат февруарската плата, бараат и реформирање на компанијата

Велигденов побара од новата влада да се заземе за интересот на Македонска пошта, бидејќи, како што рече, 2 000 вработени ќе останат на улица и ќе биде единствен пример во светот државна пошта да не функционира, односно да не постои.

Синдикалните претставници во „Пошта на Северна Македонија“ побараа реформите во компанијата да почнат што побрзо, со преземање посериозни мерки за стабилизирање на состојбите.

„Да нема повеќе 15 подружници со 15 директори и илјада соработници, нам ни требаат работници во технолошкиот процес за граѓаните да бидат задоволни од нашите услуги“,

истакна Сашо Димитриески, повереник во Синдикатот на Македонска пошта.

Имаме 15 подружници и 15 директори, а сѐ помалку работници, Синдикатот на Македонска пошта бара спас во новата систематизација

И Димитриески побара идната влада да преземе мерки, а од регулаторното тело Агенција за пошти, за кое рече дека добиваат добар прилив за плати од нив, да работи според Законот за поштенски услуги.

„Имаме информации дека во нашата држава се дистрибуираат пратки од соседните земји, што е во спротивност со сите меѓународни прописи за поштенски сообраќај. Агенцијата да преземе одговорност спрема другите оператори кои вршат неконкурентна и нелојална достава на пратки“,

додаде Димитриески.

На прес-конфренцијата беше побарано да се престане и со партизираната кадровска политика која ја уништила Македонска пошта.

На новинарско прашање дали поради лошите услови вработените си заминуваат од Македонска пошта, Велигденов даде потврден одговор додавајќи дека неизвесноста до која се доведени, во време на инфлација, е срамна.