Од Синдикатот на културните работници денеска ја повикаа министерката за култура да им достави законски упатства за пресметка на плата, со што ќе се испочитуваат двата колективни договора – Колективниот договор потпишан со Министерството за култура и Општиот колективен договор за јавен сектор
Министерката за култура Бисера Костадиновска-Стојчевска денеска даде образложение дека нема промена во Општиот колективен договор ниту во Колективниот договор за култура и рече оти нема никаква опасност од кратење на платите, туку дека платите во март повторно ќе се покачуваат
Синдикатот на културните работници денеска со протест пред Министерството за култура го изрази стравот дека нема да го земат зголемувањето согласно усогласувањето со минималната плата и предвидените 10 отсто, како што е предвидено со Општиот колективен договор за јавниот сектор.
Ова покачување тие го добија во септември минатата година, но со последното решение на министерката за култура стравуваат дека ќе бидат изиграни и реално ќе останат само со два проценти покачување на платата.
„Последната ситуација со која се соочивме беа 10 проценти од Општиот колективен договор во септември кои важеа за цела држава доживотно, но за нас вработените во културата, поединци од Министерството за култура, Министерството за финансии и МТСП ни смислија времени решенија на шест месеци. Денес тие 6 месеци истекоа, и сега пак сме соочени со премрежја затоа што некој можеби мисли дека културата во оваа држава е непотребен издаток“,
рече Вера Атанасовска, претседателка на Синдикатот на вработените во културата.
Според неа, сега истите поединци ги убедуваат оти немаат право на 10 проценти од општиот колективен договор.
„Со покачувањето на минималната плата ќе земеме 12 проценти според Колективниот договор за култура и тука веќе постојат тие 10 отсто од општиот колективен договор. Тука е замката на реториката, затоа што нема да земеме 12 проценти, туку реално ќе земеме 2 отсто. Сакаат да се случи преклопување на две засебни права од работен однос кои треба посебно да се применат“,
рече Атанасовска.
Од Синдикатот на културните работници денеска ја повикаа министерката за култура да им достави законски упатства за пресметка на плата со што ќе се испочитуваат двата колективни договора – колективниот договор потпишан со Министерството за култура и Општиот колективен договор за јавен сектор.
„Ја повикуваме министерката уште еднаш да не биде трагичар во културата, туку да се одважи, да се соочи и да им застане на патот на сите оние кои сакаат да го растурат она што заеднички го градевме. Ја повикуваме да достави законски упатства за пресметка на плата со што ќе се испочитуваат двата колективни договора, а избегнат големи судски трошоци што ќе паднат на товар на државата“,
изјави Атанасовска.
Таа посочи дека на последната седница на Советот се донесени неколку одлуки меѓу кои и одлука за протести.
Поддршка на вработените од културата денеска им даде и Сојузот на синдикати на Македонија (ССМ).
„Тоа што треба да го направат е во решението јасно да напишат дека основицата за пресметка на коефициент 1 е минималната плата или 22 567 денари, таа се множи по коефициент на сложеност и да стават уште една ставка дека основната бруто плата на работникот согласно општиот колективен договор се зголемува за дополнителни 10 проценти. И на тој начин да се надмине дилемата дека овие вработени нема да добијат само 2,15 проценти“,
изјави претседателот на ССМ, Слободан Трендафилов.
Трендафилов рече дека основната бруто-плата се зголемува за 10 отсто, а не основицата за пресметка по коефициент на сложеност.
„Не можете да им дадете на колегите пред шест месеци решение во кое 20 175 ќе им ги зголемите за 10 отсто и потоа им ги пресметувате по коефициент на сложеност и правите основна бруто плата. Ако е така тогаш треба тоа да го зголемите за дополнителни 10 отсто. Апелираме до министерката решението кое го имаат напишано да го дополнат, да го коригираат и да наведат што точно ќе добијат овие работници кога ќе ги добијат решенијата“,
рече тој.
Од ССМ упатија апел до Министерството за култура дека имаат време денеска да направат корекција како што е потребно и уште еднаш да ги консултираат Министерството за труд и социјална политика, Државниот инспекторат за труд за да се осигураат во тоа, за да, како што рече Трендафилов „да не се пријавуваме во инспекции и да не протестираме и да не штрајкуваме“.
Пред протестот на Синдикатот на културните работници, на прес-конференција министерката за култура Бисера Костадиновска-Стојчевска даде образложение дека нема промена во општиот колективен договор, ниту во колективниот договор за култура и рече оти нема никаква опасност од кратење на платите, туку дека платите
во март повторно ќе се покачуваат.
Според Костадиновска-Стојчевска, сѐ е јасно во решението за плата што Министерството за култура, преку официјална е-пошта, го достави до установите за пресметка на платите.
„Во самото решение стои дека платата се пресметува на следниот начин – основна бруто плата по следните основи: минимална бруто плата која е објавена во Службен весник согласно закон и општ колективен договор, коефициентот на сложеност согласно колективниот договор на вработениот има право на 0,5 додаток на основна бруто плата за секоја година работен стаж најмногу за 20 отсто. Овие три компоненти се непроменети. Нема промена во општиот колективен договор, нема промена во колективниот договор на Синдикатот за култура и правото за секоја година работен стаж останува“,
рече Костадиновска-Стојчевска.
Костадиновска-Стојчевска појасни дека во изминатите четири години, од 2020 до септември 2023 година, кога беше последното покачување, покачувањето на платите на културните работници, почитувајќи го колективниот договор, склучен на 30 декември 2019 година, и општиот колективен договор, изнесува 40 отсто.
„Со ова последно покачување во март, зголемувањето на платите во културата е 52 отсто“,
рече таа додавајќи дека кратење на платите во секторот нема да има.