Претседателот на државата Стево Пендаровски сега треба да го потпише Законот, па потоа тој да биде објавен во „Службен весник“, по што ќе стапи во сила
Со 90 гласа „за“ и ниту еден „против“ и „воздржан“, Собранието попладнево, во рамки на 144. седница, по скратена постапка го донесе Законот за измени на Законот за безбедност на сообраќајот на патиштата, според кој возачките дозволи со „Република Македонија“ ќе важат до крајот на годината. Согласно измените, рокот за вадење нови возачки со ознаката „Република Северна Македонија“ наместо до вечерва на полноќ, се продолжува до 31 декември 2024 година.
Претседателот на државата Стево Пендаровски сега треба да го потпише Законот, па потоа тој да биде објавен во „Службен весник“, по што ќе стапи во сила.
Законските измени ги предложија пратениците Никола Мицевски, Мартин Костовски, Вјолца Адеми, Аднан Незири, Димитар Апасиев и Павле Трајанов.
Како што истакна координаторот на ВМРО-ДПМНЕ Никола Мицевски, образложувајќи ги предложените измени, целта е изнаоѓање брзо решение во интерес на граѓаните и нивно ослободување од дополнителниот притисок околу вадењето на личните документи.
„Преку меѓусебен консензус, сите координатори на партиите дојдоа до заедничко решение, на оваа седница да предложат измени на Законот за безбедност на сообраќајот на патиштата, по скратена постапка. Се работи за мали измени, односно одредбата во која стои 12 февруари 2024 (денес), се менува со 31 декември 2024 или до крајот на годината. Сметаме дека ова законско решение ќе се овозможи намалување на долгите редици чекања. Со оглед на кратките рокови и непознаниците кај граѓаните, би апелирал до политичките субјекти во и надвор од Собраниоето, да не ја злоупотребуваат темата зашто во овој момент треба да се најде брзо решение за личните документи на граѓаните“,
нагласи Мицевски.
До итни измени на Законот дојде откако вчера Министерството за внатрешни работи ги извести граѓаните дека од 00 часот на 13 февруари 2024 година ќе важат само возачките дозволи со името Република Северна Македонија. Истото тоа се однесува и за пасошите. Ваквите одредби произлегуваат од Преспанскиот договор.
Иако претходно денеска координаторот на пратеничката група на ВМРО-ДПМНЕ во Собранието, Никола Мицевски, и министерот за внатрешни работи во техничката влада од редовите на опозициската партија, Панче Тошковски, соопштија дека освен измена на Законот за безбедност во сообраќајот на патиштата ќе предложат и измена на Законот за патните исправи на државјаните, сепак, на итната седница измени на вториот закон не беа споменати.
Денеска од тетовско Селце техничкиот премиер Талат Џафери рече дека дел од можните решенија ќе ги дефинираат со пратениците како закон, а другиот дел преку одлука на Владата, односно ќе се согледаат сите аспекти и во зависност од можностите ќе се употребат како решенија за надминување на проблемите во врска со прашањето што ќе се преземе за надминување на проблемите со употреба на возачките дозволи и пасошите чиј рок согласно Преспанскиот договор истекува вечерва на полноќ.