„Имаше еден филм „Чарлиеви ангели“. Имаше една една госпоѓа Катица Јанева која влезе во тој филм мислејќи дека никој ништо не ѝ може. Но, влезе и во мрежата на една естрадна ѕвезда“.
Вака обвинителката Вилма Русковска ги започна воведните зборови за случајот „Рекет“.
Таа рече дека во текот на постапката ќе докаже дека тоа за што е обвинета Јанева го направила од алчност и за тоа ќе презентира несоборливи докази.
„Јанева не само што ја злоупотреби функцијата туку ја предаде и довербата на народот. Не се посрамоти само себеси туку и целата јавнообвинителската институција. Ќе презентираме несоборливи докази дека свесно и со умисла на обвинетиот Јовановски му изнесувала детали од предистражните и истражните постапки, што е спротивно на Законот за кривична постапка. Тоа е направено со цел да може обвинетиот Јовановски од осомничените во постапките на Јанева да бара огромни суми пари за постапките да завршат со условна казна, на име на државата да се плати незначителен износ пари, а во најдобар случај да бидат заштитени сведоци“, рече Русковска образложувајќи го случајот.
Како поткрепа на своите тврдења, Русковска ги посочи снимките кои, како што рече, ги слушнал и добар дел од јавноста. Русковска на судот му предочи дека од одбраната можеби ќе слушне дека Орце и Ана Камчеви први побарале и молеле за помош, но, како што рече, не е така. Во продолжение, таа објасни како се остварил контактот меѓу обвинетите и Камчеви, најавувајќи ги сведочењата што ќе следуваат.
„Преку Зоран Милески-Кичеец, Јовановски стапил во контакт со Ана Камчева. Какви биле тие средби, што се разговарало, ќе слушнете од сведочењето на Ана Камчева. Ќе слушнете сведочења на бизнисмени и сигурна сум нема да ве остават рамнодушни, како што не ме оставија ниту мене. Во овој случај не станува збор дали бизнисмените се виновни или не, туку за барање пари тие да не бидат прогласени за виновни. Можеби ќе слушнете дека и тоа го направил за да му помогне на Камчев затоа што го чувствувал како брат, но тој не заборави да ја земе торбата со 1,5 милион евра. Ќе признаете, дури и ако е за брат, многу е“, рече Русковска.
Таа посочи дека во овој случај жртви не се оние од кои се барани пари, туку граѓаните на оваа држава.
По воведните зборови на Русковска, следуваа изјаснувањата на Јовановски, Јанева и Милески.
Единствено Милески призна вина, додека Боки 13 и ексспецијалната јавна обвинителка Јанева негираа дека се виновни за кривичните дела за кои се обвинети во случајот „Рекет“.
Повеќе детали за стартот на судењето, обвинението, судијката која го води рочиштето и делата што им се ставаат на товар на обвинетите можете да прочитате ТУКА.