Според Пендаровски, продолжувањето на вонредната состојба е само поради економските импликации од корона-кризата, додека за изборите ќе се разговара на нова лидерска средба следната седмица
Претседателот Стево Пендаровски соопшти, по седницата на Советот за безбедност, дека ќе потпише нова – трета одлука за прогласување вонредна состојба, ама овој пат таа ќе трае само 14 дена, што би значело заклучно со 30 мај.
Според Пендаровски, продолжувањето на вонредната состојба е само поради економските импликации од корона-кризата, додека за изборите ќе се разговара на нова лидерска средба следната седмица. Тој нагласи дека има најави за потпишување аранжман со ЕБРД и дека тоа е една од основните причини поради која се продолжува вонредната состојба, како и поради потребата да се донесат уредби со законска сила, во ситуација кога парламентот не заседава.
Втората одлука на Пендаровски за вонредна состојба во земјава истекува утре. Пред почетокот на седницата на Советот за безбедност, Владата достави до Пендаровски нов предлог за прогласување вонредна состојба, повторно во траење од 30 дена, но претседателот донесе одлука за двојно покус рок.
Пендаровски рече дека не двапати, туку три пати размислил пред да реши да донесе нова одлука за уште 14 дена вонредна состојба, посочувајќи дека тоа е сепак неопходно во оваа ситуација.
На денешната седница на Советот за безбедност се разгледувала ситуацијата со корона-кризата во земјата,во изминатите 30 дена од вонредната состојба. Оценката на Пендаровски е дека ситуацијата е подобрена, но дека се потребни дополнителни напори за санирање на состојбите и последиците.