На првиот ден од дводневниот самит ќе доминираат прашањата за Кина и Турција, додека утре главниот фокус ќе биде на економијата
Лидерите на ЕУ денеска и утре ќе се состанат на вонреден самит во Брисел за да разговараат за надворешната и безбедносната политика, како и за зајакнување на економската политика на ЕУ.
Самитот на ЕУ27 почнува попладнево со дискусија за односите меѓу ЕУ и Кина и соработката за решавање на најголемите глобални предизвици, како што се пандемијата на ковид-19 и климатските промени.
Покрај Кина, на маса во Брисел ќе бидат и ситуацијата во Белорусија, случајот со труењето на Алексеј Навални и ескалацијата на конфликтот во Нагорно Карабах.
Се очекува лидерите на ЕУ да постигнат политички договор за воведување санкции за одговорните за насилството по претседателските избори во Белорусија.
Консензусот за санкциите на ЕУ во моментов е блокиран од Кипар, кој ја условува согласноста со санкции против Турција поради нејзините активности во Источниот Медитеран.
Односите меѓу ЕУ и Турција ќе бидат тема на денешната вечера на лидерите на ЕУ.
Вториот ден од самитот на ЕУ-27 ќе биде посветен на економската стратегија на ЕУ, со акцент на тоа дека ЕУ може да биде силна на меѓународна сцена само доколку има еластична и иновативна економска основа.
Лидерите ќе разговараат за отклучување на целосниот потенцијал на единствениот пазар, развој на амбициозна индустриска политика и искористување на можностите што ги нуди развојот на дигиталните технологии.
На крајот од самитот на ЕУ27 во Брисел, лидерите ќе разменат информации за преговорите со Велика Британија, кои треба да бидат готови до крајот на оваа година, по што новите и регулирани односи меѓу двете страни ќе стапат во сила на 1 јануари 2021 година.