Волонтерите на Црвениот крст од Охрид реагираат дека утрово биле избркани од спортската сала „Билјанини извори“ која стана регионален центар за масовна вакцинација.
Тие велат дека биле повикани да помогнат од директорката на Здравствениот дом Охрид, но координаторот ги избркал.
„Екипата беше грубо избркана од страна на Сашо Денесовски, т.н. координатор на спроведување на масовната вакцинација во Охрид. За жал, и овој пат личните комплекси и фрустрации на една личност победуваат пред потребите за асистенција и помош на лицата кои се вакцинираат и на олеснување на административната работата на оние кои се вклучени да го спроведуваат вакциналниот процес, што е активност на волонтерите на Црвениот крст во сите земји во светот каде се спроведува масовна вакцинација против ковид-19. Нашите волонтери остануваат подготвени доколку има потреба да продолжат во помагање и олеснување на процесот на вакцинација против Ковид-19 на вакциналниот пункт на Здравствен дом Охрид во Општата болница Охрид“,
објавија од Црвен крст Охрид.
Засега, од Министерството за здравство нема информации во врска со случувањата утрово во регионалниот центар за масовна вакцинација во Охрид.
Покрај во Охрид, од денеска се пуштија и регионалните центри во Куманово, Штип, Кавадарци, Битола и Тетово.