Полициски патроли од утре ќе бидат во близина на секое училиште во Србија, а засилено полициско присуство ќе има на сите јавни места каде што се собираат поголем број луѓе. Ова е една од мерките кои ги најавија српските власти по двата кравави масакри кои се случија во Младеновац и во основното училиште „Владислав Рибникар“ во Белград. Видливо полициско присуство ќе има во трговските центри, парковите и на плоштадите, најави во гостување на „Пинк“, Данило Стевандиќ, државен секретар во српското Министерство за внатрешни работи.
„Ќе се обидеме во најбрз можен рок и сигурно ќе успееме да го зголемиме бројот на полицајци кои ќе бидат во училиштата. Од утре изутрина ќе има полициски патроли пред секое училиште при пристигнувањето на учениците на училиште, за време на промената на утринските и попладневните ученички смени, по завршувањето на училишната работа, кои превентивно ќе дејствуваат за безбедноста на учениците и вработените во училиштето. За време на часовите ќе има училишни полицајци кои ќе ги извршуваат своите работни задачи како што тоа го правеа во изминатите 20 години“,
потенцира Стевандиќ.
Стевандиќ се осврнува и на една од мерките која се фокусира на разоружувањето и предавање на оружјето.
„Една од мерките е да се изврши разоружување и да се испрати јавна покана до сите лица кои живеат на територијата на Република Србија да донесат такво оружје во најблиската полициска станица. Министерот Гашиќ вчера издаде наредба која се однесува на предавање на нерегистрирано оружје и муниција. И од утре до 8 јуни можат да го предадат во најблиската полициска станица, без правни последици“,
рече Стевандиќ.