Доколку би можел, би го сменил местото со загинатата, рече во завршните зборови обвинетиот Јордан Ѓорѓиев
Бранителот Душко Јанковиќ во завршните зборови посочи дека предвид треба да се земе психолошката состојба и каењето на Јордан, кој примал лекови уште од денот кога се случила несреќата
Иако обвинетиот Јордан Ѓорѓиев призна вина и изрази каење за сообраќајната несреќа кај „Сити мол“ во која загина 24-годишната Викторија Николова, сепак, судијката Љубинка Бошевска истакна дека е потребно уште еднаш да се прегледаат доказите пред да се донесе пресуда.
,,И покрај тоа што има признание, сепак, санкцијата е за сите и ние како одговорни и службени лица не треба да донесеме избрзана одлука, затоа пресудата ќе биде в понеделник во 10 часот”,
изјави Бошевска.
Ѓорѓиев во своите завршни зборови истакна дека доколку можел веднаш би го сменил местото со загинатата Николова.
„Сакам да му изразам сочувство на семејството на сега покојната. Од тој ден немам ниту еден миг раат, многу сум вознемирен. Како да би можел да променам нешто тој ден. Доколку би можел, би го сменил местото со загинатата”,
истакна Ѓорѓиев.
Бранителот Душко Јанковиќ во завршните зборови посочи дека предвид треба да се земе психолошката состојба и каењето на Јордан, кој примал лекови уште од денот кога се случила несреќата.
Адвокатите на семејството Николови, пак, повторно побараа судот да има нулта толеранција и да се земат предвид фактичката состојба и очигледните сообраќајни прекршоци.