Сè уште е активен и пожарот кај Галичица, за кој вчера од ЦУК информираа дека е делумно ставен под контрола. Пожарот од источната страна на Галичица, на територија на Ресен, според Центарот за управување со кризи, е локализиран
Од вкупно 42 пожари на отворен простор во изминатото деноноќие, во моментов 11 се активни, информира денеска Центарот за управување со кризи (ЦУК). Шест пожари се под контрола, а 25 се изгаснати.
По два од активните пожари се на територија на Општина Долнени и Пробиштип. Сè уште е активен и пожарот кај Галичица, за кој вчера од ЦУК информираа дека е делумно ставен под контрола. Пожарот од источната страна на Галичица, на територија на Ресен, според ЦУК, е локализиран.
Активни пожари во моментов има и на териториите на Македонски Брод, Кичево, Пласница, Дебар, Чашка и во Општина Маврово-Ростуше. Во пожарите низ државата главно е зафатена сува трева, нискостеблеста вегетација, нискостеблеста деградирана шума, борова, дабова и мешана шума.
Според информациите на ЦУК, во моментов под контрола се шест пожари на отворено и тоа во Кичево, Новаци, Македонски Брод, Демир Хисар, Делчево и Чашка.