Царинската управа тврди дека досега во земјава не е увезуван отпад од компанијата „Блацион“ ДОО од Бугарија откако таму се отвори истрага за нерегуларен увоз на 25 контејнери отпад од Италија во Бугарија.
„Согласно нашите податоци, компанијата ‘Блацион’ ДОО не се појавува како испраќач во увозна царинска постапка“,
наведуваат од Царинската управа.
Оттаму потенцираат дека по актуелизирањето на оваа тема тие дополнително го подигнале степенот на проверка и контрола на секаков вид отпад и материи кои би можеле да го загрозат здравјето на граѓаните.
Според податоците од оваа институција, вкупната количина на увезен отпад во земјава во 2019 година изнесува 2.215 тони за кои, нагласуваат, секој увозник доставил дозвола издадена од соодветното министерство и притоа не станува збор за увоз на опасен отпад.
„Со цел утврдување евентуални неправилности, Царинската управа, во соработка со Министерството за внатрешни работи, презема одредени активности во насока на истражување на увозот на отпад. Овие активности продолжуваат во континуитет и со други надлежни институции, а за исходот јавноста ќе биде навремено информирана“,
пишува во соопштението од Царинската управа.
*Поврзани вести:
Шилегов нема сознанија дали на „Дрисла“ се носел опасен отпад