Во 16 града во земјава се формираат ковид-центри со цел да се подготви здравствениот систем за одговор на очекуваниот есенски бран на зараза со новиот коронавирус, а од друга страна да не се компромитира редовното работење на болниците и здравјето на другите пациенти.
Подготовките веќе се започнати, во петокот од Министерството за здравство одржале видеосостанок со градоначалниците, а утре заедно со Комисијата за заразни болести ќе имаат состанок и со директорите на болниците.
Станува збор за градови каде што веќе постојат општи болници и здравствени домови: Гевгелија, Куманово, Кавадарци, Струмица, Кичево, Дебар, Гостивар, Струга, Кочани, Охрид, Велес, Тетово, Штип, Битола, Ресен и Прилеп.
„Станува збор за дополнителни времени капацитети, односно монтажни модуларни болници или креирање посебни патеки и услови во некои објекти, како и лоцирање и приспособување на одредени други капацитети кои би можеле да се адаптираат и да се користат како привремени ковид-центри“,
велат од Министерството за здравство.
Градоначалниците, велат од Министерството, се согласиле на ваквиот пристап за координација и изразиле подготвеност во рамки на своите надлежности, да ги стават на располагање сите капацитети.
На утрешниот состанок со директорите на болниците, пак, ќе се разговара за здравствените капацитети и техничките потреби.