Претседателот Стево Пендаровски преку видеообраќање информираше дека денеска во 16:30 часот по македонско време нашата земја ќе стане 30-та членка на НАТО.
„Официјалниот прием ќе биде денеска во 11:30 часот по американско време во Вашингтон, во главниот град на САД. Иако поради тешкиот период низ кој поминуваме не можеме да се израдуваме и да ги одбележиме овие настани како што доликува, сепак, станува збор за успеси кои речиси по три децении независност ја потврдуваат македонската безбедност и ја гарантираат нашата иднина“,
вели во своето обраќање претседателот Пендаровски.
Шефот на државата информираше и дека испратил писма до лидерите на земјите членки на ЕУ во знак на благодарност за одлуката на земјава да ѝ биде доделен почеток на преговори.
„Европската комисија ќе пристапи кон дефинирање на преговарачката рамка, а првата меѓувладина конференција ќе се случи во најскоро време“,
убеден е Пендаровски.