На Георгиевски во Софија му беше кажано дека не се бара промена на Устав, ниту нов договор, туку имплементација на досега договореното, велат од неговата партија
Претседателот на ВМРО-Народна партија, Љубчо Георгиевски во својата посета на Софија се обиде да објасни дека во македонско-бугарските односи има напредок и историската комисија има направено големо поместување, велат од партијата во соопштение до јавноста.
„Господинот Георгиевски се обиде да го објасни неговото мислење и позиција дека сепак во македонско-бугарските односи има напредок и стави посебен акцент на работата на заедничката историска комисија која и покрај тоа што можеби не работи со идеално темпо сепак има направено големо поместување напред што треба да биде позитивно оценето од страна на нашите соседи“
се вели во соопштението.
Од партијата посочуваат дека бугарските функционери кажале дека Софија не бара нова промена на Уставот на Македонија, ниту нов посебен договор, но инсистираат на спроведување со јасно темпо на досега договореното помеѓу двете држави, со посебен акцент на историската комисија.
„На крајот се заклучи дека во наредниот период ќе се интензивира работата за да не дојде до ставање вето на патот на Македонија кон Европската унија“,
се вели во соопштението на ВМРО-Народна партија.
При својата посета во Бугарија Георгиевски оствари средби со министерката за надворешни работи, Екатерина Захариева, со потпретседателот на Владата и министер за одбрана, Красимир Каракачанов и со генералниот секретар во кабинетот на престедателот Румен Радев, Димитар Стојанов, а имаше и интервјуа за повеќе медиуми.
Пред средбите, Георгиевски изјави дека ќе ја посети Софија за да информира дека евентуалното вето од Бугарија би било контрапродуктивно.