Власта ја злоупотребува вонредната состојба, а бројот на починати и инфицирани од ковид-19 секојдневно се зголемува, обвинува ВМРО-ДПМНЕ во соопштение до јавноста.
Од партијата повторно ги критикуваат мерките за намалување на последиците од ковид-19 оценувајќи ги како недоволни.
„Македонија и граѓаните ја плаќаат цената на неспособноста и корумпираноста на СДСМ и Зоран Заев. СДСМ задоцни со економските мерки. Стопанството е во минус. Мерките се толку непопуларни и неприменливи што голем број стопанственици се одлучуваат сами да го понесат товарот на кризата. Додека сите во регионот одвојуваат и до 40 пати повеќе од Македонија, за бизнисот и граѓаните, владата на СДСМ ја накачува акцизата за горивата“,
се вели во соопштението на ВМРО-ДПМНЕ.
Опозицијата го критикува и здравството посочувајќи дека недостасуваат основни средства за заштита, како и дека мерките не ги почитуваат најодговорните лица.
„Не се почитуваат протоколите од најодговорните и се импровизира со мерките, што резултира со континуирано зголемување на бројот на заболени и починати граѓани. Медицинските лица се оставени без соодветна заштитна опрема. Немаат визири, маски, скафандери, ниту ракавици. Затоа над 17% од заразените се медицински лица“,
велат од ВМРО-ДПМНЕ.