ВМРО-ДПМНЕ со контра обвинување кон Митко Андреевски, кој денеска на прес-конференција обвини дека лидерот на најголемата опозициска партија Христијан Мицкоски и неговиот татко биле ревиденти и консултанти на ЕЛЕМ.
Од ВМРО-ДПМНЕ велат дека триото Заев – Китанов – Андреевски го цедела буџетот на општина Струмица и граѓаните на земјава од 2011 година до денес.
„Андреевски во изминатиов период преку неговата фирма Си Ен Џи системс добил тендери за набавка на гас во општина Струмица од над 215 милиони и 250 илјади денари, односно над 3.5 милиони евра. Митко Андреевски ја почнува својата соработка со Струмица гас, ЈП формирано од општина Струмица во 2011 година, кога со неа управува Зоран Заев, како градоначалник, а директор на претпријатието е Зоран Китанов, сегашен директор на ЈП Државни патишта. Тие во 2011 година му овозможиле на Андреевски бизнис од 153 милиони и 750 илјади денари, односно над 2.5 милиони евра“,
велат од ВМРО-ДПМНЕ.
Според нив, со овој договор Заев ја оштетил општинската каса со набавка на гас по цена од 24 денари, кога истиот во тоа време од АД ЕЛЕМ за потребите на Скопје бил набавуван за 13 денари.
„Доколку се претпостави дека и АД ЕЛЕМ на сумата од 13 денари имала профит, тогаш доаѓаме до заклучок дека струмичани плаќале двапати поскап гас од остатокот од светот. Струмичани платиле една набавка на гас, како да платиле две. Оттука се поставува логичното прашање каде завршила разликата од 11 денари?! Зачудувачки е како не се нашол никој да им продаде гас на општина Струмица по пазарна цена или можеби не требало да се најде?! Ова се прашања на кои ЈО треба да поработи и да го истражи целиот случај, очигледно имаме премногу „случајности“ на едно место со кои се оштетува буџетот на државата“,
велат од ВМРО-ДПМНЕ.